Loni yongeye kwikoma u Burundi ku guhonyora uburenganzira bwa muntu

Yanditswe na IGIHE
Kuya 19 Mutarama 2018 saa 01:50
Yasuwe :
0 0

Ibihugu bigize itsinda riri kugenzura u Burundi ku iyubahirizwa ry’uburenganzira bwa muntu mu isuzuma ngarukagihe (Universal Periodic Review), byagaragaje ko mu gihugu cy’u Burundi hakiri itotezwa, ubwicanyi, ihohotera rishingiye ku gitsina no kubangamira ubwisanzure bwo gutanga ibitekerezo.

Kuri uyi nshuro ya gatatu u Burundi busuzumwe, Uyoboye itsinda rya Leta Zunze Ubumwe za Amerika muri iryo suzuma, Jason Mack, yavuze ko bababajwe n’ibikorwa by’ihohotera ry’uburenganizra bwa muntu bikomeje mu Burundi.

Yavuze ko babangamiwe n’iterabwoba Leta ishyira ku bakozi ba Loni muri icyo gihugu kandi bigakorwa n’abayobozi muri Leta ndetse n’abanyamuryango b’ishyaka riri ku butegetsi.

Yagize ati “Tubabajwe cyane n’urubuga rwa politiki rukomeje gufungwa haba ku batavuga rumwe na Leta, itangazamakuru na sosiyete sivile. Nta matora anyuze mu mucyo ashoboka mu gihe nta kwikosora kubayeho ngo hanatangwe uburenganzira ku kwibumbira hamwe kw’amashyirahamwe.”

Minisitiri ushinzwe uburenganzira bwa muntu, imibereho myiza n’uburinganire, Martin Nivyabandi, yavuze ko hari ibyakozwe guhera mu mwaka wa 2013 mu guteza imbere uburenganzira bwa muntu mu Burundi.

Yavuze ko babashije guhangana n’icuruzwa ry’abantu, kurwanya ihohoterwa rishingiye ku gitsina no kurwanya ubucucike muri gereza.

Yagize ati “Twashyizeho urwego rutanga ubufasha mu by’amategeko.Kandi ntabwo abantu tubaha umunyamategeko gusa, banahabwa inama no kubayobora kandi tugakurikirana ko uburenganzira bwa buri wese bwubahirijwe.”

Leta y’u Burundi yahagaritse imikoranire yose n’Ishami rya Loni ryita ku burenganzira bwa muntu, yangiye akanama gashinzwe iperereza kujya gusuzuma uburenganzira bwa muntu muri icyo gihugu.

VOA News dukesha iyi nkuru yatangaje ko ibihugu byinshi byari byitabiriye iryo suzuma byasabye u Burundi kwisubiraho.

Hagiye haboneka abigaragambya bashinja u Burundi kutubahiriza uburenganzira bwa muntu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza