Mkapa yizeye ko ibiganiro bizagarura amahoro mu Burundi nubwo guverinoma yanze kubyitabira

Yanditswe na Jean Pierre Tuyisenge
Kuya 17 Gashyantare 2017 saa 04:37
Yasuwe :
0 0

Umuhuza mu biganiro by’Abarundi, William Benjamin Mkapa, kuri uyu wa Kane, yasubukuye ibiganiro i Arusha muri Tanzania bigamije gukura u Burundi mu bibazo bigiye kumara imyaka hafi ibiri nubwo Leta y’u Burundi yanze kubyitabira.

Leta y’u Burundi yavuze ko itakwitabira ibiganiro birimo abahunze igihugu bari gukurikiranwa n’ubutabera bw’u Burundi n’uhagarariye Umuryango w’Abibumbye Jamal Benomar nk’uko RFI yabitangaje.

Umuhuza wahoze ari Perezida wa Tanzania yabwiye itangazamakuru i Arusha kuri uyu wa Kane, ko nubwo Guverinoma y’u Burundi ititabiriye ibiganiro, hari icyizere ko bizageza ku mahoro.

Yagize ati “Mfite icyizere ko tuzagera ku mwanzuro uzatugeza ku mahoro arambye, ahari ibihano by’ubukungu tukahashyira imikorere myiza mu bukungu, kandi ndizera ko bizanatugeza no mu nzira yo gucyura impunzi.”

Mkapa yagerageje gusobanura impamvu y’ibura rya Guverinoma mu biganiro, ariko abenshi bibajije uko bizarangira.

Umuvugizi wa Guverinoma y’u Burundi, Philipe Nzobonimpa yatangaje ko “Guverinoma yakiriye ibaruwa ku wa 13 Gashyantare kugira ngo yohereze itsinda ryayo mu biganiro i Arusha, ariko yanga kubyitabira kubera Umujyanama Mukuru wa Loni, Benomar Jamal abirimo, ariko ntihatangwa impamvu.

Nubwo Guverinoma y’u Burundi ititabiriye, Mkapa ntibyamubujije gukomeza akazi ke.

Yagize ati “Natumiye gusa amashyaka ya politiki, ubu ngiye gukora ku buryo mpura n’abahagarariye Guverinoma y’u Burundi. Nari nabonye ko ari byiza ko ntumira amashyaka yose, gusa ngiye guhamagara na Guverinoma by’umwihariko.”

Visi Perezida w’ishyaka rya Frodebu, Léonce Ngendakumana yavugiye i Arusha ati “Sinumva impamvu Guverinoma itaza mu biganiro bivugwamo ibyo iri kugiramo uruhare harimo no kwica amasezerano ya Arusha no kurenga ku biteganwa n’Itegeko Nshinga.”

Leta y’u Burundi yatangaje icyemezo cyo kwigaragambya kubera umwanzuro wa Mkapa wo guhuza impande zombi mu Burundi, ariko nticyanogeye amashyaka ya politiki ahari, amenshi muri yo yahise abona ko ubwo ibyo biganiro bipfuye nk’ibyabanje.

Umuhuza mu biganiro by’Abarundi, William Benjamin Mkapa yizeye ko ibiganiro bizagarura amahoro mu Burundi nubwo guverinoma yanze kubyitabira

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza