Moïse Katumbi aridegembya muri Zambia

Yanditswe na Jean Pierre Tuyisenge
Kuya 15 Werurwe 2017 saa 09:25
Yasuwe :
0 0

Moïse Katumbi wahoze ari Guverineri w’Intara ya Katanga, utavuga rumwe n’ubutegetsi bwa Repubulika Iharanira Demokarasi ya Congo, yagaragaye muri Zambia, mu gihe Guverinoma yateganyaga ko yakabaye atabwa muri yombi.

Moïse Katumbi yashyiriweho impapuro zo kumuta muri yombi ku wa 13 Gicurasi 2016 zisaba ko yafatwa haba mu gihugu no hanze yacyo.

Jeune Afrique dukesha iyi nkuru ivuga ko kugira ngo yerekane ko atihishe, yagaragaye areba umukino wa kimwe cya kabiri wa CAN y’abatarengeje imyaka 20 wahuzaga Zambia na Afurika y’Epfo ku kibuga cy’umupira cya Lusaka.

Icyo gihe yari kumwe n’umujyanama we mu bya politiki, Salomon Kalonda Della n’uwahoze ari umukinyi w’icyamamare muri Zambia akaba yaranahoze ayobora Ishyirahamwe ry’umupira w’amaguru muri iki gihugu, Kalusha Bwalya.

Katumbi yagize ati “Bitandukanye n’ibinyoma bigamije kunsiga isura itari nziza, ndagenda nemye nk’umuntu uri iwabo, naboneyeho kujya gusura inshuti zanjye ziri hano.”

Moïse Katumbi wigeze kuba Guverineri w’Intara ya Katanga muri Repubulika Iharanira Demokarasi ya Congo, yemejwe n’ihuriro ry’amashyaka arindwi atavuga rumwe n’ubutegetsi, rizwi nka G7 nk’umukandida ku mwanya wa Perezida wa Repubulika ku wa 30 Werurwe 2016.

Nyuma y’ibyumweru bibiri atangaje ko aziyamamariza kuyobora RDC, Moise Katumbi yashyiriweho impapuro zimuta muri yombi, akekwaho kwinjiza mu gihugu abasirikare b’abacancuro baturutse muri Leta Zunze Ubumwe za Amerika.

Yagiye kwivuza mu Bubiligi avuye muri Afurika y’Epfo umwaka ushize nyuma y’uko umuganga we yemeje ko ubuzima bwe butifashe neza.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza