Kwamamaza

Mombasa, umujyi wiganjemo ab’akarimi karyoshye n’ibyabaye amateka i Kigali (Amafoto)

Yanditswe kuya 7-10-2016 saa 17:48' na Munyengabe Murungi Sabin


Imvugo yakwiye hose mu Rwanda ko abantu b’i Nyamirambo bagira akarimi karyoshye mu biganiro no mu bushabitsi ariko iyo ukandagiye ku butaka bwa Mombasa uhita ubona itandukaniro.

Ugisohoka mu kibuga cy’indege cya Moi International Airport mu Mujyi wa Mombasa wakirwa n’abiganjemo abasore n’abagabo bavuga Igiswahili mu mvugo iganisha ku cyatuma ukora mu mufuka ukabahereza impamba yose witwaje.

Uhereye ku muntu uguteruza imizigo ukagera ku bakwakira winjira muri hoteli, buri wese aba akubwira ati ‘karibu kwetu ndugu’[ikaze iwacu muvandimwe], yarangize kuguha serivisi akakwibutsa ko icyayi kirimo tangawizi ari cyiza ku mubiri bityo ko mugisangiye bitaba bibi. Iyo umubwiye ko bidashoboka arakubwira ati ‘Asante ndugu’ wabyanga nabwo akavuga uko.

Abatuye mu mujyi wa Mombasa bagira umwihariko wo gukoresha akarimi kareshya umukiriya mu rurimi waba uvuga rwose. Ntiwapfa kwinjira mu iduka ngo usohokemo utaguze, uhura n’umuswahili akakureshya kugeza wemeye.

Umujyi wa Mombasa ni uwa kabiri mu bunini muri Kenya nyuma ya Nairobi, utuwe n’abantu babarirwa muri miliyoni n’ibihumbi magana abiri. Ni umujyi w’ubucuruzi, ufite icyambu gikomeye kigizwe n’igice kinini cya Kilindini.

Abatuye Mombasa biganjemo Abaswahili ndetse n’abo mu bwoko bwa Mijikenda. Uyu mujyi utuwe kandi n’amoko anyuranye arimo aba Luo, Taita Bantus, Akamba, Luhya bakomoka mu Burengerazuba bwa Kenya, Abahinde, Abasomali.

Abasenga biganjemo Abayisilamu, Aba-Hindu ndetse n’abakirisitu. Mu buhamya abatuye muri uyu mujyi bahaye umunyamakuru wa IGIHE bavuga ko hari ubundi bwoko bwinshi bw’insengero ntoya nyinshi ziganjemo izishamikiye ku myemerere y’Abahinde n’Abasomali.

Mombasa ni umujyi wubatse ku kirwa kigabanyijemo ibice bitatu, mu majyepfo hari agace kitwa Likoni kukageraho bisaba ubwato naho mu majyaruguru ugeraho wambutse ikiraro cya Nyali Bridge kiri mu duce dusurwa cyane. Igice cy’Uburengerazuba kirimo ikibuga cy’indege [cyubatse ahitwa Chaani] cyo gihujwe na Mombasa n’umuhanda uca hejuru y’amazi wa Makupa.

Mu Mujyi wa Mombasa mu burengerazuba hacamo umuhanda wa gariyamoshi uhuza Uganda na Kenya. Uyu muhanda wa gariyamoshi uhuje Mombasa n’utundi duce two muri Afurika y’Uburangerazuba turimo Nairobi, Dar es Salaam, Malindi na Lamu.

Uri rwagati mu Mujyi wa Mombasa ntiwarenga umutaru utabonye inyubako ikoreramo banki ikomeye, hakorera Banki y’u Buhinde, Central Bank, KCB, Barclays, Standard Bank, Stanbic Bank, Crane Bank, Equity Bank, Gulfafrica Bank, Ecobank,
Bank of Africa,ABC Bank, Commercial Bank of Africa, Fina Bank n’izindi nyinshi.

Amashuri akomeye arahabarizwa nka Kenyatta University,The Aga Khan Academy, Aga Khan High School, Serani Primary School, Serani High School, Santokben Nursery School, Coast Academy, Jaffery Academy, Mombasa Primary School, Loreto Convent n’andi menshi.

I Mombasa hari imihanda yitiriwe Jomo Kenyatta, Digo, Nyerere, Nkurumah, Moi, Mama Ngina Drive, Barack Obama n’indi itandukanye.

Ibice nyaburanga bisurwa cyane i Mombasa harimo Old Town[ahatuwe bwa mbere n’abaswahili ndetse n’Abanya-Portugal mu myaka yo hamber] ndetse n’inzu ndangamurage ya Kenya yitwa Fort Jesus.

Utundi guce dusurwa cyane n’abakerarugendo turimo inkombe z’inyanja y’Abahinde kuri Nyali Beach, Bamburi beach, Shanzu, Shelly, Tiwi, Diani. Aha ni naho habarizwa hoteli zihagazeho muri Mombasa yose.

Mombasa ibarizwamo ibyabaye amateka i Kigali

1.Mu Mujyi wa Mombasa aho uciye hose uhura n’amashashi mu mabara atandukanye aguruka mu kirere nk’ikimenyetso cy’uko isuku itifashe neza. Ni kenshi kandi usanga harunze imyanda kandi ari mu mujyi rwagati.

2.Uburyo bwo gutwara abantu n’ibintu buri mu kajagari gakomeye ndetse bukorwa n’imodoka ziganjemo amatagisi [izo bita Matatus] ndetse n’utumodoka tw’amapine atatu twitwa [Tukutus]. Ni nako usanga henshi mu mujyi hari umubyigano n’urusaku rw’amahoni mu bigero bitandukanye.

3.Inyubako zirangwa mu Mujyi wa Mombasa inyinshi ziganjemo izishaje, inyubako ndende zifite amagorofa menshi wazibara ku ntoki mu gihe i Kigali izikora mu bicu ziri kuzamuka ubutitsa.

4.Muri uyu mujyi biragoye guhura n’umupolisi wo ku muhanda ucunga ibinyabiziga, abamotari, abatwara tukutuku, matatus, amakamyo, abafite izabo n’abandi batwara ku muvuduko bifuza. Ibyo gucunga umutekano bisa n’ibyoroheje muri uyu mujyi kuko no ku kibuga cy’indege uhura n’abatarenze batatu nabwo wamaze gusohoka.

Ibi ntiwapfa kubibona mu Mujyi wa Kigali rwagati insinga zinyuranamo n'imiturirwa

5.I Kigali byabaye amateka kuba wabona nko hejuru yo kwa Rubangura haca insinga z’amashanyarazi mu gihe i Mombasa usanga imiturirwa inyuranamo n’amashanyarazi.

6.Mbere ya 2010 i Nyamirambo habaga imodoka zitwara abagenzi zakanyujijeho mu rubyiruko kubera umuziki n’ibishushanyo by’ibyamamare. Izi zaciwe i Kigali ubu zisigaye i Mombasa, uba wicaye muri tagisi shoferi agacuranga umuziki udunda ukawumvira mu gatuza, iyo uvuze ngo bagabanye ubura ukwitaho. Muri izi modoka kandi haba aba convoyeur bagenda bahamagara abagenzi nka kumwe byahoze i Nyamirambo.

Mombasa igaragaramo akajagari n’ibindi byinshi bitakigezweho i Kigali ariko hejuru ya byose uyu mujyi ufite uhishemo ubukire bukomeye ndetse ifaranga ryabo ryihagazeho mu karere.

I Mombasa, byaba ari inzozi ubonye umuntu uvunja amafaranga wemera kwakira ay’u Rwanda akaguha amashilingi yo muri Kenya, iyo ugiye kuvunjija ay’u Rwanda benshi usanga bakubwira ko batayazi n’uhumurije akemera kukuvunjira akubwira ko ibihumbi ijana by’u Rwanda abivunjamo bine by’amashilingi.

Amarembo ya Mombasa
Urebeye hejuru ubona Umujyi wa Mombasa ucyeye ariko hasi harimo umwanda
Utumodoka twitwa Tukutuku nitwo tumeze nka moto z'i Kigali
Kaminuza ya Kenyatta i Mombasa
Mu Rwanda twerekana ingagi, i Mombasa ho berekana amafi
Banki y'Abahinde, imwe mu zikomeye cyane i Mombasa
Inyubako nyinshi zirashaje
Ingoro Aba-Hindu basengeramo
Abacuruza ubuconsho ubasanga mu mujyi hagati ntacyo bikanga
Iki gice cyo hepfo ni cyo 'Old Town'
Ingoro ndangamurage ya Kenya ya Fort Jesus
Muri Tukutuku shoferi atendeka umugenzi nta gutinya polisi
Inyubako ikoreramo ikigo cy'ubwishingizi
Izi modoka zakanyujijeho i Nyamirambo mu myaka yashize ni zo zigezweho i Mombasa
Mu mubyigano buri wese aba ashakisha aho aca
Ugeze hano wakeka ko ari i Nyamirambo
Tukutuku n'imodoka ziyora imyanda ziba ari urujya n'uruza mu mujyi
Imyanda usanga irunze mu Mujyi wa Mombasa
Uyu acuruza amazi
Umuhanda ugana ku ngoro y'Aba-Hindu
Abikoreye imizigo baba babyigana n'imodoka
Abacuruza amakara no mu mujyi hagati baba barimo

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Thursday 8 Ukuboza 2016
Copyright © 2009 -2014 - IGIHE Ltd - All Rights Reserved