Museveni yasabye inzego z’umutekano guhagarika iyicarubozo rikorerwa abakekwaho ibyaha

Yanditswe na IGIHE
Kuya 16 Gicurasi 2017 saa 07:32
Yasuwe :
0 0

Perezida wa Uganda Yoweri Museveni yasabye ko gukorera iyicarubozo abakekwaho ibyaha nka bumwe mu buryo bwo gukora iperereza bihagarara.

Mu ibaruwa yandikiye inzego nkuru z’igihugu yavuze ko ibikorwa bibabaza umubiri bishobora gutuma umuntu wari umwere yemera icyaha kandi si uburyo bwiza bwo kubona ibimenyetso byakwifashishwa mu rukiko.

Yagize ati “ Nubwo abakurikiranyweho ibyaha badapfa kubyemera ariko abashinzwe iperereza iyo bakoze akazi kabo neza, hagenzurwa ibikumwe, hakifashishwa amafoto, ibizamini bya ADN cyangwa abatangabuhamya, ibimenyetso byaboneka.

Museveni yavuze ko nubwo iyicarubozo ryari ryemewe muri sosiyete zimwe na zimwe hambere, ubu bitakiri ngombwa kurikoresha.

Yavuze ko Uganda yabashije guhangana n’ibibazo by’umutekano muke nkaswe udutsiko tw’abitwaje intwaro bifashisha moto mu kugenda hirya no hino barasa bantu.

Ati “ Ntituzananirwa guhangana n’udutsiko tw’abifashisha moto mu kwica abantu baba abagenda mu modoka zabo cyangwa abagenda n’amaguru. Ni abanyabyaha bibwira ko bashobora kwica abantu ntibamenyekane nyamara bazamenyekana binyuze mu gushaka ibimenyetso aho gukoresha iyicaruboazo.”

Muri Werurwe uyu mwaka, Umuvugizi wa Polisi muri Uganda, Assistant Inspector General of Police (AIGP) Andrew Felix Kaweesi yishwe arashwe hamwe n’abarinzi be babiri ubwo yavaga iwe mu rugo i Kulambiro mu Mujyi wa Kampala.

Urupfu rutunguranye rw’uyu muyobozi rwatumye benshi batangira guterwa ubwoba no kuba hashobora kuba hari gututumba umwuka utari mwiza ahanini ushingiye ku mutekano muke uri muri iki gihugu.

Museveni yasabye ko inzego z'umutekano zihagarika gukorera iyicarubozo abakorwaho iperereza

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza


Warning: mysqli_query(): (HY000/1194): Table 'spip_jobs' is marked as crashed and should be repaired in /home/lex94/public_html/ecrire/req/mysql.php on line 244