Kwamamaza

Nigeria: Perezida Buhari mu mazi abira kubera ibyo yavuze ku mugore we

Yanditswe kuya 17-10-2016 saa 11:52' na Hagengimana Philbert


Perezida wa Nigeria, Muhammadu Buhari akomeje kunengwa na benshi ku mbuga nkoranyambaga nyuma yo kuvugira kuri televiziyo ko umugore we ari uwo mu gikoni.

Aya magambo Perezida Buhari yayavugiye mu kiganiro n’abanyamakuru aho yari mu ruzinduko mu Budage, bikaba byatumye benshi bamwibazaho nk’uko babigaragarije ku mbuga nkoranyambaga nyuma y’amashusho BBC yashyize hanze uwo Mukuru w’Igihugu abivuga.

Muri icyo kiganiro yarimo hamwe na Chancellor w’u Budage, Angela Merkel, yagize ati “Sinzi ishyaka umugore wanjye abarizwamo, ariko ni uwo mu gikoni, mu cyumba cyo kuraramo ndetse no mu kindi cyumba.”

Perezida Buhari yabivuze asubiza ku byo umugore we aherutse kuvuga ku butegetsi bwa Nigeria, ko adateze kongera gushyigikira umugabo we mu matora y’Umukuru w’Igihugu ataha mu gihe cyose ataravugurura Guverinoma.

Aisha Buhari, Umugore wa Perezida wa Nigeria, mu kiganiro na BBC Hausa, yavuze ko ubutegetsi bwigaruriwe n’itsinda ry’abantu bagize uruhare mu kwegukana umwanya w’Umukuru w’Igihugu kwa Muhammadu Buhari.

Uwo mugore mu kiganiro na BBC yakomeje avuga ko Perezida Buhari atazi neza abantu bose yahaye imyanya mu butegetsi, ngo kuko harimo abadakurikiza umurongo ngenderwaho n’icyerekezo by’ishyaka riri ku butegetsi.

Igitero kuri Perezida Buhari ku mbuga nkoranyambaga

Nyuma y’ikiganiro n’abanyamakuru mu Budage, BBC yashyize ku mbuga nkoranyambaga amashusho y’aho Perezida Buhari yavugiye ko umugore we ari uwo mu gikoni, maze abantu batandukanye bamugaragariza uburakari, aho bamwe batatinye kubigaragaza nk’ubugwari.

Uwitwa Simon Joash yagize ati “Ni irihe tandukaniro hagati ya Muhammadu Buhari wa Nigeria na Donald Trump wa Amerika? Bombi bumva abagore ari ab’agaciro gaciriritse.”

Undi yagize ati “Waguye mu mutego…Buri wese afite uburenganzira bwo kugaragaza ibyo atekereza, mu buryo ashaka, hatitawe aho yaba ari hose…Emera amakosa kandi uhe icyuho impinduka.”

Adu Amani na we yagize ati “Kuki yashyize umukobwa we mu ishuri kandi azaba uwo mu gikoni cy’undi muntu. Twirirwa duhanganye n’abatubaha abagore none na Perezida ashyizeho ibye. Ni inde uzubaha umugore we?”

Chijioke Festus Ome ati “Ibyo Perezida Buhari yabivugiye mu maso y’umugore Angela Merkel, umwe mu b’abanyamaboko muri politiki kuri uyu mubumbe w’Isi. Ikindi kandi yagiye kumusaba ubufasha butari ubwo mu cyumba cyo kuraramo ntibube n’ubwo mu gikoni, ahubwo ni ubwo kurwanya iterabwoba.”

Bassey BigBa Ekpenyong na we yagize ati “Buhari, ubwo umugore wawe yakwamamazaga yabikoreraga mu gikoni cyangwa mu cyumba muraramo?”

Icyakora hari n’abagaragaje ko bari mu ruhande rwa Perezida Buhari, aho nka Elnathan John, Umwanditsi unakunda gukoresha Twitter cyane muri Nigeria, yagaragaje ko ibyo Aisha Buhari yavuze bigaragaza ko adasobanukiwe icyo Demokarasi ari cyo.

Umuvugizi wa Perezida Buhari, Garba Shehu, yasabye ko ibyo uwo Mukuru w’Igihugu yavuze babifata nko gutebya, kuko mbere yo kubivuga yabanje gukubita agatwenge kandi mu bikorwa bye akaba anafasha abagore benshi.

Uguterana amagambo gukomeye hagati ya Perezida wa Nigeria, Muhammadu Buhari n’umugore we gukomeje kuvugisha benshi ku mbuga nkoranyambaga

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Friday 9 Ukuboza 2016
Copyright © 2009 -2014 - IGIHE Ltd - All Rights Reserved