Nyarutarama: Ngo gucika kw’inzoga z’inkorano muri Kangondo ni ihurizo rikomeye

Nyarutarama: Ngo gucika kw’inzoga z’inkorano muri Kangondo ni ihurizo rikomeye


Yanditswe kuya 20-11-2013 - Saa 15:30'

Abatuye mu mudugudu wa Kangondo mu Kagari ka Nyarutarama mu murenge wa Remera, ho mu Karere ka asabo bemeza ko gucika kw’inzoga z’inkorano ari ihurizo rikomeye cyane, nyamara kandi ngo babona bugarijwe cyane n’urugomo ruterwa na zo.

Izi nzoga zo ngo n'ubwo zemewe nabwo hategetswe ko ubundi zigomba kunyobwa kuva saa mbiri kugeza saa sita z'ijoro

Nsengiyumva Olivier, umusore w’imyaka 30 utuye mu mudugudu wa Kangondo, aho bakunze kwita muri bannya he, yabwiye IGIHE ko muri uyu mudugudu hakirangwa inzoga nyinshi z’inkorano ziganjemo urwarwa na kanyanga, ndetse n’izindi bahimba amazina asebye nk’imbutabuta, n’ibikwangari.

“Ubu se koko ubusinzi n’urugomo by’abasinzi, n’uburaya byahashira gute mu gihe abaturage b’aha twibanira n’abacuruzi b’izo kanyanga n’inzagwa, urebye n’aka kajagari twiberamo?”

Nyandwi Olivier, nawe utuye muri Bannya he, we avuga ko n’impamvu indaya zidacika muri uyu mudugudu, ari uko harangwa abasinzi benshi, kubera uburyo inzoga z’inkorano zitahabura.

Ati “aha twugarijwe n’ubusinzi bukabije ntituryama ngo dusinzire kubera imirwano yabo. Maze iyo ugiye kureba ukanasanga n’inzoga zabasindishije si za zindi dusanzwe tuzi. Ahubwo ni za kanyanga n’inzagwa utabonera izina.

Yakomeje avuga ko impamvu ubusinzi budashira muri aka gace ari uko izo nzoga benshi mu bazicuruzaga bamaze kumenya uko zikorwa ku buryo bazikorera bigatuma zitabura muri ako gace dore ko gatuwemo n’abapagasi, abakarasi, abayede n’abafundi, kandi ngo bazikunda kubi, ku buryo badatana no kuzinnywa haba kumanywa haba nijoro.

Uwase Sophie we yabwiye IGIHE ko izi nzoga z’inkorano aha mu Kidelenka zihuzuye kandi n’abayobozi barabizi, ariko ngo yibaza impamvu ntacyo babikoraho nta n’ingamba bakunze kubifatira, mu gihe zibujijwe ndetse ziteza umutekano muke.

Gusa nubwo hari bamwe mu bacuruzi batungwa agatoki ko bazicuruza, bo bakomeza kubihakana bavuga ko ntazo bacuruza.

Umukecuru uri mu kigero cy’imyaka 61, nawe utuye muri Kngondo, igihe kitari gito, ashinnjwa n’abaturanyi be kuba acuruza inzoga z’inkorano, ariko we akabihakana, ku buryo yabwiye IGIHE ko bamubeshyera, nyamara ku bigarag umunyamakuru yageze iwe asanga hari kunyobwa ikinyobwa kidasanzwe cyenda gusa n’urwagwa ariko bigoye guhamya ko arirwo.

Mukecuru yagize ati: “Njye rwose ni uko banyanga sincuruza urwagwa cyangwa kanyanga, ahubwo nicururiza akagage gusa cyangwa umutobe, ariko kubera urwango bamwe bamfitiye bambeshyera ko ari izo nzoga nkora.”

Uwimbabazi Georgette, Umunyamabanga nshingwabikorwa w’Akagari ka Nyarutarama, we yabwiye IGHE ko iki kibazo cy’inzoga z’inkorano bivugwa ko zikigaragara muri uyu mudugudu, ngo bagifatiye ingamba bafatanyije na Polisi.

Yagize ati: “Iki kibazo hari ingamba twagifatiye, ndetse tugiye gushyira mu bikorwa dufatanyije na Polisi vuba, nubwo ntari buzigutangarize kugirango bidatuma zitazagera ku musaruro ufatika twateganyije, dore ko abanyamakuru iyo mutangaje ikintu barushya kumenya uburyo bakomeza kubihisha.”

Yarangije avuga ko nubwo bikigaragara ko zinanyobwa kumanywa, kandi abaturage babibujijwe, ubu ngo hamaze gufungwa ububari bugera kuri burindwi babuziza gucuruza inzoga ku manywa mu gihe cy’imirimo.

Zimwe mu nzoga z'inkorano umunyamakuru wa IGIHE yasanze ziri gukorwa no kunyobwa
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO