Kwamamaza

Nyuma y’u Burundi na Afurika y’Epfo, Gambia nayo yikuye muri ICC

Yanditswe kuya 26-10-2016 saa 18:35' na Jean Pierre Tuyisenge


Gambia yatangaje ko na yo igiye kwivana mu Rukiko Mpuzamahanga Mpanabyaha ICC rw’i La Haye mu Buholandi, nyuma yo kurushinja ko rukurikirana Abanyafurika gusa.

Iki gihugu kije gikurikira Afurika y’Epfo n’u Burundi biherutse gutangaza ku mugaragaro ko bivuyemo.

Uru rukiko rwashinzwe mu mwaka wa 2002, hagamijwe gukurikirana ibyaha bikorerwa mu ntamabara n’ibyibasiye inyokomuntu ku Isi yose, gusa ubu rushinjwa kwibasira abatuye ku mugabane wa Afurika gusa.

BBC dukesha iyi nkuru ivuga ko, Minisitiri w’Itangazamakuru muri icyo gihugu Sheriff Bojang, yavuze ko urwo rukiko rutigeze rukurikirana abayobozi bo mu bihugu byo mu Burengerazuba bw’Isi.

Avugira kuri Televiziyo y’igihugu, yagize ati “Usibye kuba rwitwa ko ari urukiko Mpuzamahanga, ni urukiko rwibasira abirabura gusa.”

Yongeyeho ati “ Hari ibihugu bigera kuri 30 byo mu Burengerazuba bw’Isi byakoze ibyaha byo mu ntambara, bihohotera ibindi bihugu n’abaturage babyo kuva ICC yashingwa, kandi nta na kimwe muri byo cyigeze kigezwa imbere y’uru rukiko."

Yatanze urugero ko rwananiwe gukurikirana uwahoze ari Minisitiri w’Intebe w’u Bwongereza Tony Blair ku birebana n’intambara ya Iraq.

Umushinjacyaha Mukuru w’uru rukiko Fatou Bensouda, ni Umunya-Gambia wigeze kuba umujyanama wa Perezida Jammeh , ubwo yafataga ubutegetsi mu 1994 akaba yarigeze no kuba Minisitiri w’ubutabera w’iki gihugu.

Afurika y’Epfo mu cyumweru gishize yatangaje ko yatangiye umugambi wo kwivana muri ICC. Uwahoze ari umushinjacyaha warwo mukuru, Luis Moreno Ocampo, yanenze iki gihugu n’u Burundi avuga ko bihaye urwaho abategetsi ba Afurika rwo gukora Jenoside n’ibindi byaha bikomeye.

Ibihugu bya Kenya, Uganda na Sudani na byo bishobora gukurikira ibi byamaze kuvamo kuko byakomeje kumvikana binenga bikomeye imikorere y’uru rukiko.

Hari icyo ibi bihugu byavuze kuri uru rukiko

Sudani

Perezida Omar al- Bashir wa Sudani na we akurikiranwe na ICC . Uru rukiko rwamushyiriyeho impapuro zo kumuta muri yombi muri 2009, bukaba bwari ubwa mbere rubikoze ku Mukuru w’Igihugu ukiri ku butegetsi.

Kimwe n’abandi bakurikiranwe n’uru rukiko, Bashir ashinjwa kugira uruhare mu byaha by’intambara, ibyibasiye inyokomuntu n’ibya Jenoside mu gace ka Darfour. Ni Intambara yatangiye muri Gashyantare 2003, ubwo umutwe wavugaga ko uharanira kubohora Sudani (SLM) n’undi wavugaga ko uharanira ubutabera n’uburinganire (JEM) byatangiye kurwanya Leta ya Sudani buyishinja gutoteza abaturage batavuga Icyarabu.

Bashir yateye utwatsi ibyo birego avuga ko ICC ari urukiko rwa Politiki. Ibihugu byo ku mugabane wa Afurika byatesheje agaciro iby’impapuro zo kumuta muri yombi bikomeza kumwakira mu bihugu byabo.

Bashir yagiye muri Afurika y’Epfo mu nama y’Umuryango wa Afurika Yunze Ubumwe (AU) avayo nyamara urukiko rwaho rwarategekaga ku muta muri yombi.

Kenya

Uru rukiko kandi rwongeye kwibasira Perezida wa Kenya, Uhuru Kenyatta na Visi Perezida William Ruto, runatanga itegeko ryo guta muri yombi Abanya-Kenya batandatu mu mwaka wa 2010.

Abacamanza bo muri urwo rukiko bafashe icyemezo cyo gukuraho ibyo birego kuri Kenyatta na William Ruto muri Mata 2014, bavuga ko ababashinjaga batigeze batanga ibimenyetso bihamye. Mu nama ya 26 y’Umuryango wa Afurika y’Iburasirazuba yabaye ku wa 30 na 31 Mutarama 2016, Kenya yasabye ko ibihugu byo muri uwo muryango byatangira gutekereza inzira yo kuva muri ICC.

Uganda

Perezida wa Uganda, Yoweri Kaguta Museveni, ubwo yarahiriraga kuyobora Uganda ku wa 12 Gicurasi 2016, yavuze ko ICC ari urukiko rukoreshwa n’abanyapolitiki bo mu bihugu byo mu Burengerazuba bw’Isi ngo bagenzure aba Afurika. Amagambo ya Museveni yatumye abashyitsi bari baturutse mu Muryango w’Ubumwe by’Ibihugu by’I Burayi na Leta Zunze Ubumwe za Amerika bahaguruka bava muri ibyo birori.

Afurika iramutse yikuye mu Rukiko Mpuzamahanga Mpanabyaha rw’i La Haye mu Buholandi, byatuma rutakaza ibihugu 34 mu 124 byashyize umukono kuri ayo masezerano.

Perezida wa Gambia, Yahya Jammeh

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Sunday 4 Ukuboza 2016
Copyright © 2009 -2014 - IGIHE Ltd - All Rights Reserved