Papa Francis azayobora isengesho ryo gusabira amahoro Sudani y’Epfo na RDC

Yanditswe na Cyprien Niyomwungeri
Kuya 17 Ugushyingo 2017 saa 10:11
Yasuwe :
0 0

Umushumba wa Kiliziya Gatolika ku Isi, Papa Francis kuwa Kane w’icyumweru gitaha tariki 23 Ugushyingo 2017, azayobora isengesho ry’amahoro ryo gusabira Sudani y’Epfo na Repubulika Iharanira Demokarasi ya Congo (RDC).

Iri sengesho rizabera muri Bazilika ya Mutagatifu Petero i Roma ku i saa kumi n’imwe n’igice z’umugoroba nkuko Radiyo Vatican yabitangaje. Abakirisitu bo ku Isi yose bahamagariwe gusengera amahoro kuri uriya munsi by’umwihariko bagasabira Sudani y’Epfo na RDC, aho miliyoni z’abaturage zikomeje gushegeshwa n’imvururu za politiki.

Umuyobozi w’Umuryango uharanira ubumwe i Roma, Sr. Yudith Pereira Rico, yabwiye itangazamakuru ko ubwo yari muri Sudani y’Epfo, icyo yasabwe cyane n’abaturage ari ukubwira Isi ibibera muri icyo gihugu kirimo intambara ya gisivili kuva mu 2013 yatumye abatari bake baba impunzi.

Yudith agereranya intambara iri muri Sudani y’Epfo nka Jenoside yagizwe ibanga. Avuga ko kuba abaturage b’icyo gihugu bakumva ko Papa n’Isi yose barimo kubasengera, byabaha icyizere ko Isi yose iri kumwe na bo.

Yagize ati “Kuri bo ni isoko y’imbaraga n’icyizere cy’ahazaza kumva ko batari bonyine. Ni ingenzi kuko bazabikuramo imbaraga zo kwihanganira ubuzima barimo bw’ubuhunzi n’ibindi.”

Muri Nzeri uyu mwaka intumwa ya Papa muri RDC, Mgr Luis Mariano Montemayor, ubwo yari muri Katederali yitiriwe Mutagatifu Clement i Kananga, yatangaje ko mu bwitonzi bwinshi na dipolomasi, Papa Francis arimo kwibutsa imiryango mpuzamahanga kumenya umukoro wayo mu kurengera inzirakarengane mu gace ka Kasaï.

Papa Francis yakunze kuvuga cyane kuri RDC, aho muri Kamena yavuze ko imirwano ikwiye guhagarara muri Kasaï kugira ngo abagiraneza bashobore kugoboka abari mu kaga. Yanategetse uhagarariye Vatican mu kanama ka Loni gashinzwe uburenganzira bwa muntu gusaba ko imirwano muri Kasaï ihagarara hagatangwa ubutabazi by’umwihariko ku bana.

Imirwano yo muri Kasaï bivugwa ko yatangiye nyuma yo kutavuga rumwe kwa Leta n’umwe mu bayobozi baho witwa Jean-Pierre Mpandi washinze umutwe wa ‘Kamuina Nsapu’, witwara gisirikare muri aka gace aho unashinjwa na Leta guteza umutekano muke.

Uyu yaje kwicwa mu mirwano yo muri Kanama 2016. Guverinoma yashinje umutwe witwaje intwaro wa ‘Kamuina Nsapu’ kujugunya imirambo y’abantu mu byobo rusange gusa Loni yemeza ko iperereza ryerekana ko abenshi bishwe bikekwa ko ari abo muri uwo mutwe.

Umushumba wa Kiliziya Gatolika ku Isi, Papa Francis

Urifuza kuduha amakuru? Hamagara iyi nimero 4546
Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza