Perezida Magufuli yasabwe kongera kwandika Itegeko Nshinga rya Tanzania

Yanditswe na Philbert Girinema
Kuya 21 Ugushyingo 2016 saa 09:13
Yasuwe :
0 0

Ihuriro ku Itegeko Nshinga rya Tanzania (TCF), ryasabye Perezida Magufuli gutangira kwandika itegeko nshinga rishya, nkuko ishyaka rye CCM ryabisezeranye mu matora ya 2015.

Nkuko The Citizen ibitangaza, Umuhuzabikorwa wa TCF, Hebron Mwakagenda, yavuze ko miliyari z’amashilingi zamaze gukurwa muri icyo gikorwa cyitezweho guha abanya-Tanzania icyizere cyo kubona irindi tegeko nshinga ribabereye kandi rijyanye n’igihe.

Ibi Mwakagenda yabivuze asubiza Perezida Magufuki uherutse gutangaza ko ibirebana n’itegeko nshinga rishya rya Tanzania bitari mu biraje ishinga Guverinoma ye bityo kongera kuryandika bizaterwa n’uko azaba nta kindi kimuzitira.

Mwakagenda yavuze ko ingingo ya 144 ya Manifesto ya CCM isezeranya abazayitora ko igikorwa cyo kongera kwandika itegeko nshinga kizaba cyarangiye, hanyuma inyandiko yayo igakwirakwizwa mbere y’uko ritorwa muri referendumu.

Yagize ati “Mu nyandiko y’ibyo CCM izakora birasobanutse neza ko izaba yarangije kwandika Itegeko Nshinga rishya, inyandiko igakwirakwizwa hagati ya 2015 na 2020.”

Akomeza avuga ko CCM igomba guha umwanya ukomeye iri tegeko nshinga yasezeranye ko rigomba gusobanura neza ibijyanye n’ubumwe bwa Tanzania na Zanzibar.

Agira ati “Bigomba kuzirikanwa ko Perezida Magufuli yari umukandida wa CCM, atari umukandida wigenga, agomba rero gusohoza amasezerano yatanzwe n’ishyaka rye arimo kongera gutangiza no gusoza ibyo kwandika itegeko nshinga rishya.”

TCF ivuga ko bidakwiye ko bategereza igihe cy’amatora ngo babe aribwo hatangira igikorwa cyo kwandika itegeko nshinga, ko ahubwo bikwiye gukorwa mbere muri 2017 na 2018.

Iri huriro rikomeza rivuga ko Magufuli adasubukuye igikorwa cyo kwandika Itegeko Nshinga ribereye Tanzania, ibyo yakoze byose byazaba imfabusa.

Perezida Magufuli yasabwe kongera kwandika Itegeko Nshinga rya Tanzania

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza