Kwamamaza

Perezida Museveni yasobanuye iby’ifungwa rya Kaminuza ya Makerere

Yanditswe kuya 3-11-2016 saa 14:11' na Ntakirutimana Deus


Perezida wa Uganda, Yoweri Kaguta Museveni yagaye bikomeye imyitwarire y’abarimu bigisha muri kaminuza ya Makerere, aherutse gufunga, nyuma yo kwishora mu myigarambyo basaba kongererwa umushahara kandi ikibazo cyabo kiri gushakirwa umuti.

Yabitangaje mu kiganiro yagiranye n’abanyamakuru cyabereye mu Karere ka Luwero ku mugoroba wo ku wa Gatatu tariki ya 2 Ugushyingo 2016 nkuko New Vision dukesha iyi nkuru yabitangaje.

Museveni yagaye imyitwarire y’abo barimu, ati “Ndashaka kubabwira ko tutazihanganira iyi myitwarire mibi ukundi. Byarangiye.[…] Ntabwo ari ibyo gukina murabyibuka.Umuntu uvuga ngo niba mutampaye amafaranga ngiye guhungabanya igihugu, oya iyo ntabwo ari imyitwarire myiza.”

Yavuze ko ikibazo cy’abo barimu ku bijyanye no kubongerera umushahara guverinoma ikiri kucyigaho, akaba atiyumvisha impamvu badashobora kwihangana mu gihe hari ibirimo gukorwa.

Ati “ Kubona abarimu batigisha ahubwo bakirirwa batanga igihe ntarengwa, ntabwo ari imyitwarire myiza. Tukababwira gusubira ku kazi bakabyanga, twemerewe gufunga kaminuza, kandi twafashe umwanzuro ukwiye."

Perezida Museveni yavuze ko iyo kaminuza izafungurwa mu minsi ya vuba.

Ati “ Turashaka gufungura iyo kaminuza vuba ku buryo abanyeshuri badacikiriza amasomo yabo.”

Perezida Museveni wa Uganda yafunze Kaminuza ya Makerere, imwe mu zikomeye muri icyo gihugu, icyemezo ngo yafashe mu rwego rwo kurengera abantu n’ibintu.

Icyemezo cyo gufunga iyi kaminuza cyagaragaye mu itangazo, Perezida Museveni yashyizeho umukono kuwa kabiri tariki ya 1 Ugushyingo 2016.

Abanyeshuri bo muri iyo kaminuza bari bamaze iminsi bishora mu myigaragambyo yatangiye ku wa 20 Ukwakira, ubwo bigaragambyaga bavugaga ko bahabwa amafunguro mabi.

Icyo gihe abanyeshuri barigaragambije, bamena inzugi n’amadirishya y’ibyumba byo gufatiramo amafunguro, ibikombe n’amasahane, banangiza byinshi muri iyo Kaminuza. Ibyo byakurikiwe no kwirukana abanyeshuri 15 ku wa 26 Ukwakira nk’uko ibinyamakuru bitandukanye byabitangaje.

Mu 2014, Kaminuza ya Makerere yari yafashe icyemezo cyo kutazongera kugaburira abanyeshuri bigira ku mfashanyo ya Leta, ihagarika no kujya igemura amafunguro hanze y’ikigo, ibyo ngo byari byemejwe mu rwego rwo kurushaho kwita cyane ku ireme ry’uburezi itanga ndetse n’ubushakashatsi.

Iyo myigaragambyo ngo yahanganishije aba banyeshuri n’inzego z’umutekano zarinze kwifashisha imyuka iryana mu maso kugira ngo babatatanye, nyuma yo guhangana nabo babatera amabuye.

Iyindi myigaragambyo yakozwe n’abarimu, ikaba ari nayo yagarutsweho na Perezida Museveni.

Ni umwanzuro bafashe tariki ya 31 Ukwakira, nyuma y’Inteko rusange y’abarimu yemeje ko bigaragambya kugeza igihe bishyuriwe imishahara yabo. Abanyeshuri na bo bahise biyunga kuri abo barimu kuri uyu wa Kabiri tariki ya 1 Ugushyingo.

Bigaragambyaga bishyuza agahimbazamusyi ku mishahara yabo y’amezi umunani ashize batabariyemo ukwa cumi uyu mwaka.

Umuyobozi ushinzwe abanyeshuri muri iyi kaminuza, Roy Ssembogga,
yabasabye kuba bihanganiye iki cyemezo cy’Umukuru w’Igihugu, ababwira ko igisubizo cya nyuma ari we kiri buturukeho nyuma yo kuganira na Minisiteri y’Uburezi.

Perezida Museveni yanenze icyemezo abarimu bafashe cyo kwigaragambya
Abanyeshuri n'abarimu babo mu myigaragambyo
Bamwe mu banyeshuri biga muri Kaminuza ya Makerere bazinze utwabo barataha
Amashuri yafunzwe, nta munyeshuri n'umwe urimo
Abapolisi bari bagose Kaminuza ya Makerere bagerageza guhosha imyigaragambyo
Museveni aganira n'abanyamakuru mu gace ka Luweero
Perezida Yoweri Kaguta Museveni yatangaje ko yafashe icyemezo cyo gufunga Kaminuza ya Makerere mu rwego rwo kurengera abantu n’ibintu

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Thursday 8 Ukuboza 2016
Copyright © 2009 -2014 - IGIHE Ltd - All Rights Reserved