Kwamamaza

Perezida Nkurunziza yashyize umukono ku itegeko ryo kuva muri ICC

Yanditswe kuya 18-10-2016 saa 21:04' na Ntakirutimana Deus


Perezida w’u Burundi, Pierre Nkurunziza yashyize umukono ku itegeko rikura iki gihugu mu bigengwa n’Urukiko Mpuzamahanga Mpanabyaha (ICC) rukorera i La Haye mu Buholandi.

Perezida Nkurunziza yasinye iri tegeko, kuri uyu wa Kabiri, tariki ya 18 Ukwakira 2016, nyuma y’iminsi itandatu, Inteko Ishinga Amategeko, Umutwe w’Abadepite n’uwa Sena, batoye umushinga w’itegeko rikura u Burundi mu masezerano ya Roma ashyiraho ICC, yemeranyijweho kuya 17 Nyakanga 1998.

U Burundi bwafashe icyemezo cyo kwivana muri uru rukiko nyuma y’icyifuzo cyakomojweho n’ibihugu byinshi muri Afurika bigengwa n’amasezerano arushyiraho, birimo Uganda na Kenya. Ibi bihugu byombi byakekwaga ko gatanya yabyo na ICC yashoboraga gukorerwa i Kigali mu nama y’Umuryango w’Afurika Yunze Ubumwe iheruka kubera mu Rwanda, ariko ntibyakunda.

Inyandiko yo kwivana muri ayo masezerano yagaragaye ku rubuga nkoranyambaga rwa Twitter ya Perezidansi y’u Burundi. Iyo nyandiko igaragaza ko u Burundi bwivanye mu bihugu byashyize umukono ku masezerano ashyiraho urwo rukiko, biba bigomba no kubahiriza amategeko arushyiraho.

Umukono utavuguruzwa mu Burundi wa Perezida Nkurunziza uje ukurikira umwanzuro wari wafashwe n’Inteko Ishinga Amategeko y’iki gihugu tariki ya 12 Ukwakira 2016, w’umushinga w’itegeko ryemerera iki gihugu kwitandukanya n’uru rukiko nyuma y’uko rutangaje ko ruzakora iperereza ku byaha bihungabanya uburenganzira bwa muntu n’ibyibasiye inyokomuntu byakorewe muri icyo gihugu kuva muri Mata 2015, ubwo Perezida Nkurunziza yari amaze gutangaza ko aziyamamaza muri manda ya gatatu.

Mbere y’uko u Burundi bwivana muri ayo masezerano, Umuyobozi w’Ihuriro ry’ibihugu byashyize umukono ku masezerano Sidiki Kaba, yatangaje ko kibangamiye bikomeye gahunda yo guca umuco wo kudahana ku Isi.

ICC ifite ububasha bwo gukurikirana ibyaha bya Jenoside, ibyaha by’intambara n’ibyibasiye inyokomuntu, yashyizweho n’amasezerano ya Roma, itangira gukora ku wa 1 Nyakanga 2002, aho ihuriweho n’ibihugu 124.

Jeune Afrique dukesha yanditse iyi nkuru itangaza ko bamwe mu basesenguzi mu bya politiki, basanga iki cyemezo cy’u Burundi ari igihamya cy’uko Guverinoma hari ibyaha bikomeye ishobora kuba yikekaho bityo igatinya gukurikiranwa n’uru rukiko.

U Burundi bufite inshingano yo kubahiriza ibyo ICC izabusaba mu gihe cy’umwaka. Nyuma yawo ni bwo iki gihugu gishobora kuyivamo burundu, nkuko bikubiye mu masezerano bwasinye yo gushyiraho ICC.

Perezida Nkurunziza Pierre yashyize umukono ku itegeko rikura igihugu cye muri ICC
Inyandiko yashyizweho umukono na Perezida w'u Burundi, Pierre Nkurunziza

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Friday 9 Ukuboza 2016
Copyright © 2009 -2014 - IGIHE Ltd - All Rights Reserved