Kwamamaza

Perezida Zuma yamaze amasaha ane ahatwa ibibazo ku cyaha cya ruswa

Yanditswe kuya 7-10-2016 saa 15:39' na Philbert Hagengimana


Perezida wa Afurika y’Epfo, Jacob Zuma yamaranye amasaha ane n’Umushinjacyaha mukuru, Thuli Madonsela, ahatwa ibibazo ku byaha bya ruswa n’itonesha mu gushyira abayobozi mu myanya haba mu nzego z’ubutegetsi bwite bwa Leta ndetse no mu bigo bimwe na bimwe.

Jeune Afrique dukesha iyi nkuru itangaza ko Umushinjacyaha Thuli Madonsela uzasoza manda ye mu minsi itanu iri imbere (kuwa 15 Ukwakira), yamaranye amasaha ane na Perezida Jacob Zuma, atari mu rwego rwo kumushimira akazi yakoze mu myaka 7 amaze, ahubwo ari ku mpamvu z’iperereza ku byaha uwo mukuru w’igihugu amaze iminsi akekwaho.

Nyuma y’iryo bazwa, hashyizwe ahagaragara itangazo ryagiraga riti “Kuri uyu wa Kane tariki ya 6 Ukwakira, Thuli Madonsela yakiriye Perezida Jacob Zuma mu rwego rw’iperereza ku myitwarire y’umuryango wa Gupta mu iyirukanwa ry’abaminisitiri n’ishyirwaho ry’abandi kimwe n’abagize inama z’ubutegetsi mu bigo bya Leta.”

Abakire baba bagira uruhare mu ishyirwaho ry’abategetsi n’iyirukanwa rya bamwe

Icyo gitangazamakuru dukesha iyi nkuru kivuga ko Ishyaka ANC riri ku butegetsi muri Afurika y’Epfo rishinja bamwe mu bagize Umuryango wa Gupta ukomoka mu Buhinde, kugira uruhare ishyirwaho ry’abayobozi muri za Minisiteri, ariko ibiro bya perezida byo bikabihakana.

Icyakora Jacob Zuma we yemera ko afitanye ubucuti n’uwo muryango (Gupta), ukungahaye ahanini bishingiye ku mabuye y’agaciro, Ubuhanga mu by’ubwubatsi, ikoranabuhanga, itangazamakuru n’ibindi by’umutungo utimukanwa.

Iperereza ry’Umushinjacyaha mukuru ryanagarutse ku ruhare abo banyamuryango ba Gupta bagize mu gutanga amasoko ya Leta kimwe n’itoneshwa ry’amasosiyete awushamikiyeho.

Basabye ko Zuma yazabazwa n’umushinjacyaha yasimbuje Thuli Madonsela

Muri iryo bazwa, abunganira Perezida Jacob Zuma, bavuze ko batabonye umwanya uhagije wo kwitegura, bityo ko bikwiye ko bareka umukiliya wabo akazasubiza nyuma abicishije mu nyandiko igenewe Umushinjacyaha mukuru, ibyo bikaba bishobora gutuma Thuli Madonsela arangiza manda ye atabajije uwo mukuru w’igihugu.

Umushinjacyaha Busisiwe Mkhwebane uzatangira akazi ke nk’umusimbura wa Thuli Madonsela yatangaje ko ikimuraje ishinga atari ibyo bya ruswa ivugwa ku mukuru w’igihugu, ko ahubwo azibanda ku bakizahajwe n’ubukene, batagira amazi cyangwa amashanyarazi.

Ati “Ni byo, ni ingenzi kwita kuri icyo kibazo cya ruswa, ariko ntekereza ko umwanya w’ibanze ukwiye guhabwa abaturage bo hasi.

Umushinjacyaha Busisiwe Mkhwebane w’imyaka 46 yashyizweho na Perezida Jacob Zuma, biza kwemezwa n’Inteko ishinga Amategeko biciye mu nzira ndende.

Yari asanzwe ari Umusesenguzi muri Minisiteri y’Umutekano, akaba yarakunze gushinjwa n’abatavuga rumwe n’ubutegetsi, kuba intasi ya Afurika y’Epfo ubwo yakoreraga mu Bushinwa, ariko akaba yaraje kubihakana mu kiganiro kuri Televiziyo SABC, avuga ko “ari ibihuha”.


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Friday 9 Ukuboza 2016
Copyright © 2009 -2014 - IGIHE Ltd - All Rights Reserved