RDC: Kiliziya Gatolika yitandukanyije na Perezida Kabila

Yanditswe na Kanamugire Emmanuel
Kuya 22 Ukwakira 2016 saa 06:43
Yasuwe :
0 0

Kiliziya Gatolika yo muri Repubulika Iharanira Demokarasi ya Congo iherutse gusohoka mu biganiro by’amahoro byaberaga muri icyo gihugu bitarangiye, yatangaje ko yitandukanyije na kandidatire ya Perezida Joseph Kabila mu kwiyamamariza amatora ataha.

Abasenyeri bo muri icyo gihugu babitangaje mu itangazo bashyize ahabona ry’inama y’abepisikopi muri icyo gihugu(Cenco), ku wa Gatanu tariki ya 21 Ukwakira 2016.

Batangaje ko bigomba kuba ihame ko Perezida Kabila ataziyamamariza kuyobora igihugu muri manda ya gatatu nk’uko biteganywa n’ingingo ya 220 y’itegeko nshinga.

Abasenyeri 20 bitabiraga ibiganiro by’amahoro bafashe umwanzuro wo kubisohokamo ubwo byendaga kugana ku musozo.

Iyo nama kandi ntiyigeze yitabirwa na bamwe mu bagize ihuriro rikomeye ritavuga rumwe na Perezida Kabila.

Ibyo biganiro byatangiye tariki ya 1 Nzeri bisoza ku ya 18 Ukwakira uyu mwaka, bisoza hasinywa amasezerano hagati y’abatavuga rumwe na leta bari bake n’abashyigikiye leta bemeranyijwe ko amatora azaba muri Mata 2018, aho kuba mu mpera z’uyu mwaka nk’uko byari biteganyijwe, kuko ari bwo Perezida Kabila yagombaga kurangiza manda.

Ayo masezerano agena ko Perezida Kabila azaba agumye ku butegetsi muri leta y’inzibacyuho, aho umwanya wa Minisitiri w’Intebe ugomba guhabwa uwo mu gice kitavuga rumwe n’ubutegetsi.

Abo basenyeri bagaragaza impungenge ko mu mpera z’amezi abiri ari imbere [ ubwo Kabila azaba asoza manda] abafite aho bahuriye n’ibikorwa bya politiki bigoye ko bazahura ngo bashake igisubizo ku bibazo biri muri Congo Kinshasa, izo mpungenge bagakomeza bazigaragaza ko bishobora kuzashyira Congo mu kavuyo.

Imwe muri Kiliziya iherereye mu mujyi wa Kinshasa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza