RDC: Abanyagatolika bongeye gutegura imyigaragambyo yamagana Kabila

Yanditswe na Mukaneza M.Ange
Kuya 15 Mutarama 2018 saa 09:02
Yasuwe :
0 0

Nyuma y’imyigaragarambyo yabaye mu mpera z’umwaka ushize ikagwamo abantu batandatu, Ihuriro ry’Abakirisitu bo muri Kiliziya Gatolika muri Repubulika Iharanira Demokarasi ya Congo ryari ryayiteguye, ryongeye guhamagarira abaturage kwigaragambya bamagana Perezida Joseph Kabila wanze kurekura ubutegetsi.

Tariki ya 31 Ukuboza 2017, nibwo abanyagatolika bo hirya no hino muri iki gihugu bitabiriye imyigaragambyo, baza gutatanywa na polisi ndetse n’abasirikare, uretse abahasize ubuzima hari n’abakomeretse mu gihe abandi batawe muri yombi.

Itangazo ryashyizwe hanze na Komite y’Abalayiki yahamagariye abaturage kuza kwitabira indi myigaragambyo izaba mu mahoro tariki ya 21 Mutarama 2018.

Iryo tangazo rigira riti “ Kuri iki Cyumweru tariki 21 Mutarama 2018, dufatanye urunana nk’uko bisanzwe, tuzakore urugendo mu mahoro, twitwaje imikindo yacu ishushanya amahoro, bibiliya zacu, amashapule n’imisaraba yacu tujye gutabara Congo, umurage duhuriyeho, mu cyubahiro ry’abantu n’ibintu.”

Jeune Afrique dukesha iyi nkuru ivuga ko iby’iyi myigaragambyo byatangajwe nyuma ya misa yo gusabira abaguye mu ya mbere, yayobowe na Musenyeri Laurent Monsengwo uyobora Diyosezi ya Kinshasa.

Muri iyi misa, Monsengwo yavuze ko aho kubatera ubwoba, ubutegetsi bwa Kabila bwatumye barushaho gushikama no kwishimira uburenganzira bwo kwigaragambya mu ruhame bahabwa n’Itegeko Nshinga ry’iki gihugu.

Nyuma y’iyi misa, polisi ivuga ko yatatanyije itsinda ry’abantu bari bateraniye hafi ya kiliziya, babiri bagakomeraka.

Abanyagatolika basaba Kabila kwemerera mu ruhame ko adateganya kwiyamamariza kuyobora indi manda mu matora ateganyijwe tariki 23 Ukuboza 2018.

Manda ya kabiri ari nayo ya nyuma ya Kabila yarangiye tariki 20 Ukuboza 2016, gusa Itegeko Nshinga rimwemerera kuguma ku butegetsi kugeza abonye umusimbura. Yatangiye kuyobora mu 2001, asimbuye se Laurent Kabila.

Kabila akomeje kotswa igitutu asabwa kuva ku butegetsi

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza