RDC: Ibiro umunani bya Monusco bigiye gufungwa n’abakozi 764 bahagarikwe

Yanditswe na Evariste Nsengimana
Kuya 27 Mata 2019 saa 10:25
Yasuwe :
0 0

Ishami ry’Umuryango w’Abibumbye muri Repubulika Iharanira Demokarasi ya Congo, ryatangaje ko rigiye gufunga ibiro umunani by’ingabo zibungabunga amahoro muri iki gihugu (Monusco), kugabanya izi ngabo ndetse rigakuraho imyanya y’abakozi 764 kubera ikibazo cy’ingengo y’imari.

Itangazo ryo gufunga ibyo biro no gukuraho iyo myanya ryasohowe muri iki cyumweru, risobanura ko bizakorwa bitarenze Kamena uyu mwaka.

Nk’uko RFI yabyanditse, izo mpinduka zigamije kongera imbaraga mu gace k’Uburasirazuba bw’iki gihugu karimo imitwe y’inyeshyamba myinshi kubera ko ingengo y’imari idahagije ku buryo yakoreshwa mu bice byombi.

Ibyo biro umunani bigiye gufungwa birimo ibya Dungu, Mbandaka, Bandundu, Kamina, Matadi, Mbuji-Mayi, Kisangani na Lubumbashi ariko Loni ivuga ko kubifunga bitavuga ko ibikorwa byo kuhagenzura bihagaze.

Loni ivuga ko hari ibimenyetso ko mu gace k’Uburasirazuba hari umutekano muke, hakenewe kongerwa ababungabunga umutekano w’abasivile.

Ivuga ko mu cyumweru gishize yohereje amatsinda 15 mu bikorwa byo kubungabunga amahoro mu bice bitandukanye birimo n’ibyo Monusco idafitemo ibiro.

Iryo tangazo rivuga ko ikurwaho ry’iyo myanya 764 nta ngaruka bizagira ku basirikare bari mu butumwa bw’amahoro kuko yakorwagamo n’abasivile b’Abanye-Congo.

Monusco imaze imyaka isaga 20 muri RDC. Joseph Kabila wahoze ari Perezida wa RDC, yavuze ko byaba byiza ihagaritse ibikorwa byayo muri iki gihugu.

Nubwo Perezida Félix Tshisekedi avuga ko Monusco ifite ingabo zikora neza ariko nawe ashyigikiye ko yahagarika ibikorwa byayo kuko nta musaruro ufatika bitanga mu gukumira ibikorwa by’inyeshyamba.

Ubusanzwe Monusco yahabwaga ingengo y’imari y’asaga miliyari y’amadolari ya Amerika ku mwaka.

Muri Mutarama uyu mwaka Umunyamabanga mukuru wa Loni Antonio Guterres, yavuze uwo muryango ufitiwe ibirarane by’agasaga miliyari ebyiri z’amadolari ya Amerika utarishyurwa.

Leta Zunze Ubumwe za Amerika isanzwe ari umuterankunga ukomeye w’Akanama k’Amahoro ka Loni iheruka gutangaza ku nkunga yakageneraga igiye kugabanyaho miliyari 6.7$, zihariye hafi 25% by’ingengo y’imari yako yose.

Umujyanama wa Leta Zunze Ubumwe za Amerika mu by’umutekano, John Bolton, yavuze ko ‘Icyo gihugu kitazakomeza kugenera iyo inkunga Afurika kubera nta musaruro’.

Ibiro umunani bya Monusco bigiye gufungwa n'abakozi bahagarikwe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza