RDC: Imyaka 20 irashize ubutegetsi bwa Mobutu buhirimye

Yanditswe na Mukaneza M.Ange
Kuya 16 Gicurasi 2017 saa 12:38
Yasuwe :
0 0

u itariki ya 16 Gicurasi 1997, nibwo Mobutu Sese Seko Kuku Ngbendu wa Zabanga wayoboye Repubulika iharanira Demokarasi ya Congo (RDC) yahoze yitwa Zaïre, yahiritswe ku butegetsi, ndetse nyuma y’amezi make agwa mu buhungiro muri Maroc.

Mobutu wayoboye kuva mu 1965, yahiritswe ku butegetsi n’umutwe w’ingabo za AFDL , wari warashinzwe na Laurent Desiré Kabila, se wa Joseph Kabila uyobora RDC kugeza ubu.

Kuri uyu munsi mu myaka 20 ishize, Mobutu yabyukanye ubwoba, dore ko ingabo za AFDL zari ziyobowe na Kabila zari zaramaze kwinjira mu murwa mukuru Kinshasa, ndetse zimwe zarashinze ibirindiro mu marembo y’umujyi.

Yari azi neza ko yakuweho amaboko n’Abanyamerika nyuma y’uko ibiganiro by’amahoro byari biyobowe na Nelson Mandela na Omar Bongo byari byananiwe kugira icyo bigeraho.

Ahagana 7h 50 kuwa 16 Gicurasi 1997, imodoka za Mobutu zagerageje gushaka inzira igera ku kibuga cy’indege cya Ndjili ariko bucece, ahita afata indege imugeza mu gace ka Gbadolite aho yari yaravukiye.

Ku itariki ya 17 Gicurasi, nibwo ingabo za Kabila zinjiye i Kinshasa, zakiranwa ibyishimo n’abaturage bari bararambiwe ubutegetsi bw’igitugu bwa Mobutu.

Nyuma yo kubigirwamo inama n’umuhungu w’imfura, Mobutu wari urembejwe na kanseri y’ubugabo, ndetse amaze gusobanukirwa ko atazapfira mu gihugu cye ari perezida, yafashe umwanzuro wo guhungira muri Togo yakirwa na Perezida Gnassingbé Eyadéma kuwa 17 Gicurasi 1997.

Nyuma yo kwimwa ubuhungiro n’u Bufaransa, tariki ta 23 Gicurasi 1997, Mobutu yerekeje muri Maroc ku butumire bw’umwami Hassan II.

Nk’uko Radio Mpuzamahanga y’Abafaransa (RFI) yabigarutseho, Mobutu yamaze igihe aba mu gace ka Tanger mu Majyaruguru ya Maroc, ubuzima bwe bukomeza kumera nabi biba ngombwa ko mu mpera za Nyakanga ajyanwa mu bitaro mu mujyi wa Rabat.

Muri icyo gihe umuryango we wari ucumbikiwe ahazwi nka Hay Riad urinzwe bikomeye, dore ko Maroc ari kimwe mu bihugu byari bishyigikiye Mobutu ndetse mu 1977 na 1978, Umwami Hassan II yari yaramwoherereje ingabo zo kumushyigikira.

Mobutu yapfuye kuwa 7 Nzeri 1997 mu mujyi wa Rabat afite imyaka 67 azize kanseri y’ubugabo. Yari yaramenye ko afite iyi kanseri mu 1989 ariko atangira kuyivuza mu 1996.

Mobutu yashyinguwe mu mujyi wa Rabat; mu 2007 Perezida Joseph Kabila yahaye uburenganzira abo mu muryango we kuzamuzana agashyingurwa mu gihugu cye cy’amavuko ariko kugeza ubu ntibirakorwa.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza