RDC: Kwimura itariki y’amatora byafashwe nko gutiza imbaraga Kabila udashaka kurekura ubutegetsi

Yanditswe na Mukaneza M.Ange
Kuya 11 Nyakanga 2017 saa 08:20
Yasuwe :
0 0

Abatavuga rumwe na Leta muri Repubulika Iharanira Demokarasi ya Congo, RDC bamaganye ibyatangajwe na Komiyisiyo y’Amatora, CENI ko nta matora azaba muri uyu mwaka, igikorwa bagereranya nko gushyigikira byeruye Perezida Joseph Kabila udashaka kuva ku butegetsi.

Tariki ya 7 Nyakanga 2017, nibwo Perezida wa CENI, Corneille Nangaa yatangarije i Paris mu Bufaransa ko gutegura amatora muri uyu mwaka bitazashoboka kubera ibibazo by’umutekano muke biri mu ntara zitandukanye by’umwirahiro iya Kasaï.

Ibyatangajwe na Nangaa ariko ntibyakiriwe neza n’amashyaka atavuga rumwe na Leta arimo UDPS, n’ihuriro ry’imiryango 33 itari iya leta, aho babigereranyije no gutiza umurindi Kabila.

Umuvugizi wa UDPS, Augustin Kabuya yagize ati “Corneille Nangaa ari gufasha Joseph Kabila kugera ku mugambi we wo kuguma ku butegetsi. Uku ni ukudushakaho impamvu, ntabwo harimo kubahiriza inshingano. Ntabwo tuzabemerera ko babikora gutya.”

Kabuya yabwiye AFP ko kuri UDPS, amasezerano yo ku wa 31 Ukuboza 2016 yashyizweho umukono na leta n’amashayaka atavuga rumwe nayo aribwo buryo bwonyine buzakura RDC mu bibazo byavutse nyuma y’uko manda ya Kabila irangiye tariki 20 Ukuboza 2016, ariko ntahite ava ku butegetsi.

Aya masezerano ateganya ko gutegura amatora ya Perezida, ay’abagize Inteko Ishinga Amategeko n’inzego z’ibanze agomba gutegurwa mbere y’uko uyu mwaka urangira.

Ikindi aya masezerano ateganya ni uko hagombaga gushyirwaho Minisitiri w’Intebe uturuka ku ruhande rw’abatavuga rumwe na leta.

Uretse UDPS yamaganye ibi, ihuriro ry’imiryango 33 itegamiye kuri leta ryatangiye gusaba ko Itegeko Nshinga ryakubahirizwa kuva mu 2016 naryo ryamaganye iki cyemezo.

Mu itangazo iri huriro ryashyize hanze ryamaganye iki cyemezo cya Corneille Nangaa kidakurikije amategeko, aho ryahamije ko kije no kurushaho gutuma ibibazo bya politiki n’imibereho biri muri RDC birushaho gukomera.

Joseph Kabila w’imyaka 46 yagiye ku butegetsi mu 2001, nyuma y’urupfu rwa se Laurent Desiré Kabila. Itegeko Nshinga RDC igenderaho ntirimwerera kongera kwiyamamariza indi manda.

Perezida Joseph Kabila akomeje kotswa igitutu n'abatamushyigikiye basaba ko haba amatora

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza