Kwamamaza

RDC: Polisi yifashishije imyuka mu gutatanya no guta muri yombi abigaragambya

Yanditswe kuya 31-10-2016 saa 11:06' na Ntakirutimana Deus


Abantu basaga 10 bavuga ko baharanira Demokarasi muri Repubulika Iharanira Demokarasi ya Congo bafatiwe mu bikorwa bitandukanye by’imyigaragambyo yamagana Perezida Joseph Kabila.

Izo mpirimbanyi zafashwe ku wa Gatandatu tariki ya 29 Ukwakira 2016, zigaragambya imbere y’inyubako y’icyicaro cy’Umuryango wa Afurika Yunze Ubumwe mu Mujyi wa Kinshasa.

Jeune Afrique yatangaje ko Polisi y’icyo gihugu yifashishije imyuka iryana mu maso itatanya abatavuga rumwe na Kabila.

Umwuka si mwiza muri icyo gihugu kiyoborwa na Kabila uzasoza manda ye ya kabiri mu Ukuboza uyu mwaka. Abatavuga rumwe n’ubutegetsi bwe bakomeje ibikorwa bigaragaza ko batifuza ko yaguma ku butegetsi, ariko Leta na yo yakajije igitutu mu kubafatira ibyemezo.

Ingero ziherwaho ni abo bantu basaga icumi bafashwe na polisi, ariko hari n’abandi batandatu bo mu mutwe wiyise ‘Filimbi’(Ifirimbi) bakurikiranyweho guteza intugunda muri rubanda ndetse no gukangurira abantu kwigumura ku butegetsi nkuko byatangajwe na Col Ezekiel Mwana Mputu, Umuvugizi wa Polisi i Kinshasa.

Uwo muvugizi yavuze ko hari bamwe mu batavuga rumwe n’ubutegetsi bafashwe nyuma bakarekurwa.

Abagize ‘Filimbi’ basaga 30 ntibakanzwe n’imvura ikomeye yagwaga i Kinshasa maze bishora mu myigaragambyo bifashisha amafirimbi yabo n’amagambo yibutsa ko manda ya Perezida Kabila igeze ku musozo. Icyo gikorwa bagikoreye hafi y’icyicaro cya AU i Kinshasa.

Umwe mu bateguye iyo myigaragambyo, Carbone Beni Wa Beya yagize ati “Twaje kwibutsa AU ko ifite inshingano ziremereye kuri Coup d’État yakorewe itegeko nshinga mu myanzuro yafatiwe mu biganiro byahuje Abanyecongo.”

Yakomeje avuga ko tariki ya 19 Ukuboza 2016, ari umunsi manda ya Perezida Kabila izaba yarangiriyeho nk’uko bigenwa n’Itegeko Nshinga ry’icyo gihugu.

I Lubumbashi, abashyigikiye Kabila bashyamiranye n’abatamwifuza

Mu Majyepfo ashyira Uburasirazuba bwa Congo, i Lubumbashi, abatavuga rumwe na Perezida Kabila bari bavuye mu nama yaberaga mu nyubako ituyemo Umuyobozi w’Ihuriro ry’Imitwe irwanya Kabila mu yahoze ari Intara ya Katanga bashyamiranye n’abamushyigikiye babagabyeho igitero ngo baburizemo imyigaragambyo barimo.

Polisi yihutiye kubatera ibyuka biryana mu maso igamije kubatatanya.

Antoine Gabriel Kyungu wa Kumwanza yavuze ko Polisi yafashe abagera kuri 29, barimo 18 bo mu ishyaka rya UDPS , 11 bo muri Unafec, na babiri bo mu ihuriro ryishyize hamwe ngo rirwanye Kabila.

Ibiganiro byahuje Leta n’abayirwanya ariko bafatwa nk’abadafite imbaraga byatangiye tariki ya 1 Nzeri 2016 muri icyo gihugu byafatiwemo umwanzuro w’uko amatora ya Perezida azaba muri Mata 2018.

Polisi yataye muri yombi bamwe mu bigaragambya bamagana manda ya gatatu ya Perezida Joseph Kabila

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Wednesday 7 Ukuboza 2016
Copyright © 2009 -2014 - IGIHE Ltd - All Rights Reserved