RDC: Ubwenegihugu bwa Minisitiri w’Intebe mushya bwateje impaka

Yanditswe na Uwishyaka Jean Louis
Kuya 22 Ugushyingo 2016 saa 09:09
Yasuwe : XX
0

Ubwenegihugu bwa Minisitiri w’Intebe, Samy Badibanga bwateje intugunda, nyuma y’aho bimenyekaniye ko afite ubw’u Bubiligi na Repubulika Iharanira Demukarasi ya Congo (RDC) kandi Itegeko Nshinga ry’iki gihugu ryemera ubwenegihugu bumwe.

Ministiri ushinzwe imikoranire n’Inteko Ishinga Amategeko, Tryphon Kin-Kiey, avuga ko ubwenegihugu bubiri butemewe n’amategeko, mu gihe umuyobozi w’abatavuga rumwe n’ubutegetsi ashimangira ko izo mpaka zidakwiye kubaho.

RFI dukesha iyi nkuru, itangaza ko hari inyandiko yashyizwe kuri murandasi, igaragaza ko Minisitiri w’Intebe, Samy Badibanga yabonye ubwenegihugu bw’u Bubiligi mu 2002.

Itegeko Nshinga rya RDC rivuga ko ubwenegihugu bw’ubunye-Congo budashobora kubangikanywa n’ubundi bw’ikindi gihugu, kandi ko kugira umwanya mu butegetsi, ugomba kuba Umunye-Congo wuzuye.

Tryphon Kin-Kiey yagize ati “Minisitiri w’Intebe washyizweho nta ngingimira tumufiteho kuko abenshi twemeranya na Perezida. Ni amahitamo meza. Ni inshuti, ariko hariya harimo ikibazo. Numvise bigibwaho impaka zikomeye mu Nteko Ishinga Amategeko. Yari akwiye kwikuraho ubwenegihugu bw’amahanga yahawe[...] ntibyakorohera kuyobora Congo mu gihe ufite ubundi bwenegihugu. Ni ngombwa ko mu minsi iri imbere cyangwa amasaha aza kuza, Badibanga aza gukemura icyo kibazo.”

Ku ruhande rw’Abatavuga rumwe n’Ubutegetsi, Umuyobozi w’ihuriro ry’abakozi baharanira iterambere, José Makila, avuga ko izo mpaka zitari zikwiriye kubaho, kuko kuva mu 2007, Inteko Ishinga Amategeko yari yafashe umwanzuro w’agateganyo, w’uko umuntu ashobora kugumana ubwenegihugu bw’ubunyamahanga kandi agakomeza imirimo ye mu nzego za leta ya Congo.

Ati “Kugeza ubu Inteko rusange ntirakuraho icyo cyemezo, ikaba ari yo mpamvu izo ari impaka zidakwiye. Itegeko Nshinga rirasobanutse. Ubwenegihugu bwa Congo ni bumwe, kandi itegeko ry’agateganyo ryemera gukomeza imirimo, ku bw’ibyo ntitwanenga umuturage wa Congo kuko afite ubwenegihugu bubiri ndetse akaba afite n’imirimo ikomeye. Inteko rusange niyo yonyine ishobora gukuraho iryo tegeko. ”

Samy Badibanga wo ku ruhande rw’Abatavuga rumwe n’ubutegetsi yashyizweho na Perezida Joseph Kabila ku wa 17 Ugushyingo 2016, ashingiye ku myanzuro yavuye mu biganiro bihuza Leta n’abatavuga rumwe na yo.

Ubusanzwe ingingo ya 10 y’Itegeko Nshinga ry’iki gihugu, ivuga ko bidashoboka kugira ubwenegihugu bubiri icya rimwe. Ivuga kandi ko kugira ubundi bwenegihugu bituma utakaza ubwa Congo.

Samy Badibanga biravugwa ko afite ubwenegihugu bubiri

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE