Kwamamaza

Umushinwa yasimbuye Umunyakenya wirukanwe ku buyobozi bwa UNMISS

Yanditswe kuya 4-11-2016 saa 11:00' na Jean Pierre Tuyisenge


Umusirikare w’Umushinwa witwa Maj-Gen Chaoying Yang yasimbuye Umunyakenya wari uyoboye ingabo z’Umuryango w’Abibumbye zishinzwe kugarura amahoro muri Sudani y’Epfo (UNMISS) wirukanwe nyuma y’iperereza ryagaragaje ko yananiwe guhagarika ibitero byibasiye abaturage muri Nyakanga uyu mwaka.

Umunyamabanga Mukuru w’Umuryango w’Abibumbye, Ban Ki-moon, kuwa Kabiri w’iki cyumweru yategetse ko Umunyakenya Lt-Gen Johnson Mogoa Kimani Ondieki wari uyoboye UNMISS yirukanwa.

Ban Ki-moon yabitangaje nyuma ya raporo yari imaze gushyirwa hanze, igaragaza ko uyu mugabo yananiwe guhagarika ibitero byo muri Nyakanga byabereye ku birindiro by’ingabo za Loni, bigahitana n’abaturage bari bahungiye mu nkambi iherereye mu Mujyi wa Juba.

Umuvugizi wa Loni, Stephen Dujarric, yatangaje ko Lt-Gen Johnson Mogoa Kimani yahise asimburwa n’Umushinwa Maj-Gen Chaoying Yang, wari Umuyobozi Wungirije muri UNMISS, nk’uko The East African yabyanditse.

Yagize ati “ Dufite icyizere gikomeye ko Maj Gen Yang azakora neza imirimo ahawe.”

Minisiteri y’Ububanyi n’Amahanga muri Kenya yasohoye itangazo rigaragaza ko batishimiye umwanzuro wafashwe na Loni wo kwirukana Lt-Gen Johnson Ondieki ivuga ko bari kwitwaza igihugu bakacyitirira amakosa yose yabaye.

Ubwo Perezida Uhuru Kenyatta yari mu ishuri rikuru rya gisirikare muri Kenya ryo mu karere ka Nakuru ku wa Kane tariki ya 3 Ugushyingo 2016, yavuze ko Kenya itazongera kujya mu bikorwa byo kubungabunga amahoro muri Sudani y’Epfo, ndetse ahita anatangaza ko agiye gukurayo ingabo n’abapolisi basaga 1000.

Umuryango Mpuzamahanga uharanira uburenganzira bw’Ikiremwamuntu, Amnesty International wavuze ko kwirukana Lt-Gen Ondieki atari igisubizo gihagije ku byavuye mu iperereza.

Intambara yadutse muri Sudani y’Epfo mu 2013, nyuma y’aho Perezida Salva Kiir ashinje Riek Machar wari Visi Perezida we gushaka kumuhirika ku butegetsi.

Machar yasubiye i Juba muri Mata uyu mwaka nyuma y’aho aba bagabo bombi bashyiriye umukono ku masezerano y’amahoro yo guhagarika intambara mu 2015, bakanemeranya kugabana ubutegetsi no gukora igisirikare kimwe.

Kuva mu 2013 ibihumbi by’Abanya-Sudani y’Epfo byarishwe, mu gihe ababarirwa muri miliyoni bakuwe mu byabo n’intambara nkuko byatangajwe na Loni.

Lt Gen Johnson Mogoa Kimani Ondieki wari uyoboye ingabo za UNMISS, yamaze kwirukanwa ahita anasimbuzwa

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Sunday 4 Ukuboza 2016
Copyright © 2009 -2014 - IGIHE Ltd - All Rights Reserved