Sudani yafunze imipaka yayo na Érythrée

Yanditswe na Ferdinand Maniraguha
Kuya 7 Mutarama 2018 saa 08:54
Yasuwe :
0 0

Sudani yatangaje ku mugaragaro ko ifunze imipaka iyihuza na Érythrée nyuma y’iminsi mike inongereye ingabo muri Leta ya Kassala ihana imbibi n’iki gihugu.

Guverineri wa Leta ya Kassala, Adam Jamma, watangaje ifungwa ry’iyo mipaka, avuga ko bijyanye n’iteka rya Perezida riherutse gusohoka ritangaza ibihe bidasanzwe.

Jamma yavuze ko imipaka ihuza Sudani ya Érythrée ifunze guhera tariki 5 Mutarama kugeza ikindi gihe kizatangazwa.

Iki cyemezo kije nyuma gato y’uko Sudani ihakanye agatotsi mu mubano wayo na Érythrée, aho yavuze ko kongera ingabo muri Kassala bijyanye n’ibihe bidasanzwe ndetse n’Iteka ryatangajwe ryo gukusanya intwaro n’imodoka zitunzwe mu buryo butemewe n’amategeko.

Yavuze kandi ko bijyanye no guca ubucuruzi bw’abantu, intwaro n’ibindi bicuruzwa bikorerwa muri utwo duce nk’uko Ibiro Ntaramakuru by’Abashinwa, Xhinua byabitangaje.

Ibihumbi by’abasirikare b’umutwe udasanzwe mu ngabo za Sudani (Rapid Support Forces) bamaze iminsi boherezwa muri Leta ya Kassala.

Tariki ya 30 Ukwakira 2017 nibwo Perezida Omar Bashir yatangaje ibihe bidasanzwe muri Leta ya Kordofan iherereye mu Burengerazuba bw’igihugu ndetse no muri Leta ya Kassala iri mu Burasirazuba. Ibyo bihe bidasanzwe bizamara amezi atandatu.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza