Tanzania yatanze isoko ry’umuhanda wa gari ya moshi ugomba kuyihuza n’u Rwanda

Yanditswe na Philbert Girinema
Kuya 9 Ugushyingo 2016 saa 02:47
Yasuwe :
0 0

Guverinoma ya Tanzania yatanze isoko ryo kubaka igice cy’umuhanda wa gari ya moshi uzahuza Morogoro na Mwanza, ari nawo ugomba kuzahuza icyo gihugu n’u Rwanda.

Guverinoma ya Tanzania izakoresha miliyari $7.6 mu kubaka uwo muhanda uzahuza icyambu cya Dar es Salaam n’u Burasirazuba bwa Repubulika Iharanira Demokarasi ya Congo.

Ikigo gishinzwe ibikorwa remezo muri Tanzania, Reli Assets Holding Company Limited (RAHCO), cyatangaje amasoko ane yo gukora inyingo no kubaka uyu muhanda uzubakwa mu byiciro, ugomba kuzahuza icyambu cya Dar es Salaam n’ibihugu bidakora ku nyanja birimo u Rwanda, Burundi n’u Burasirazuba bwa Repubulika Iharanira Demokarasi ya Congo.

Mu matangazo y’isoko iki kigo cyasohoye, kigaragaza ko harimo inyingo no kubaka umuhanda wa gari ya moshi ureshya na kilometero 336 uhuza Morogoro na Makutopora, ibilometero 294 hagati ya Makutopora na Tabora, ibilometero 133 biva Tabora bikageza Isaka, hamwe n’ibilometero 294 bizava Isaka bikageza i Mwanza.

Muri Nzeli uyu mwaka aribwo RAHCO yari yatanze isoko ry’inyigo y’umuhanda wa gari ya moshi w’ibilometero 202 biva ku cyambucya Dar es Salaam bikagera Morogoro.

Guverinoma ya Tanzania, muri Nyakanga, nibwo yahawe inguzanyo ya miliyari $7.6 na Banki yo mu Bushinwa, Export-Import Bank (Exim), igenewe kubaka uyu muhanda uzahuza iki gihugu n’abaturanyi bacyo.

Icyo gihe Perezidansi ya Tanzania yatangaje ko Exim Bank yemeye gutanga inguzanyo iciriritse y’igihe kirekire, izubaka uwo muhanda guhera muri uyu mwaka w’ingengo y’imari, nyuma y’ibiganiro byahuje Perezida John Magufuli na Perezida wa Exim Bank, Liu Liange i Dodoma.

Itangazo ryasohotse ryagiraga riti “Umuhanda wa gari ya moshi wateganyijwe uzateza imbere ubucuruzi unafashe mu kuzamura ubukungu bwa Tanzania, n’ubw’ibihugu bituranye bidakora ku nyanja birimo Uganda, Rwanda, Burundi na Repubulika Iharanira Demokarasi ya Congo.’’

Kubaka uyu muhanda bizaba ari umwe mu mishinga minini cyane izakorwa muri manda ya Perezida Dr John Pombe Magufuli, ukaba witezweho kuzahindura uburyo bw’ubwikorezi mu karere n’ubucuruzi bikorwa.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza


Warning: mysqli_query(): (HY000/1194): Table 'spip_jobs' is marked as crashed and should be repaired in /home/lex94/public_html/ecrire/req/mysql.php on line 244