U Burundi bwamaganye icyemezo cya ICC cyo gutangiza iperereza ku byaha by’intambara

Yanditswe na IGIHE
Kuya 11 Ugushyingo 2017 saa 07:15
Yasuwe :
0 0

U Burundi bwateye utwatsi icyemezo cy’Urukiko Mpuzamahanga Mpanabyaha(ICC)cyo gutangiza iperereza muri iki gihugu ku byaha by’intambara n’ibyibasiye inyokomuntu, buvuga ko nta bufatanye na bumwe buzagirana na rwo.

Imiryango iharanira uburenganzira bwa muntu mu Burundi hamwe n’abatavuga rumwe n’ubutegetsi bakiriye neza icyemezo cy’Urukiko Mpuzamahanga Mpanabyaha cyo gutangiza iperereza.

Nk’uko The Eastafrican yabitangaje, Minisitiri w’Ubutabera Aimée Laurentine Kanyana yabwiye itangazamakuru ko u Burundi budashobora kugirana imikoranire na ICC, urukiko buherutse kwitandukanya na rwo ku wa 26 Ukwakira uyu mwaka.Uru rukiko ruvuga ko ibyaha byakozwe u Burundi bukiri umunyamuryango bigomba gukurikiranwa.

Minisitiri Kanyana yagize ati “ Guverinoma yumvise igihuha mu itangazamakuru mpuzamahanga ko ICC yemereye umushinjacyaha wayo gutangiza iperereza ku Burundi.”

“ Guverinoma yamaganye iki cyemezo kandi ishimangira ko yitandukanyije n’uru rukiko n’umugambi uwo ari wo wose wo kurwongerera inshingano ku butaka bw’u Burundi.”

Ku wa Kane w’iki cyumweru ni bwo ICC yanzuye ko umushinjacyaha wayo azatangiza iperereza ku byaha by’intambara byakozwe n’abategetsi b’u Burundi kuva muri Mata 2015 kugeza mu Ukwakira 2017.

Nibura abantu bagera kuri 500 bishwe muri izi mvururu nk’uko bitangazwa n’imiryango irengera uburenganzira bwa muntu, naho abagera ku bihumbi 400 bahunga igihugu.

Urukiko Mpuzamahanga Mpanabyaha ruvuga ko ibyaha byakozwe birimo ubwicanyi, gufunga abaturage, iyicarubozo, gufata abagore ku ngufu, gushimuta abantu n’ibindi.

U Burundi bwinjiye mu bihe by’imvururu n’umutekano muke muri Mata 2015, ubwo Nkurunziza yatangazaga ko ashaka kwiyamamariza kuyobora igihugu muri manda ya gatatu, akaza no kuyitsindira.

Abatavuga rumwe n’ubutegetsi bavugaga ko icyo cyemezo kinyuranye n’Itegeko Nshinga n’amasezerano y’amahoro yashyize iherezo ku ntambara yo mu 2005.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza