U Burundi bwangiwe kuba umunyamuryango wa SADC

Yanditswe na Evariste Nsengimana
Kuya 28 Gicurasi 2019 saa 07:22
Yasuwe :
0 0

Umuyobozi w’Umuryango w’Ibihugu byo mu Majyepfo ya Afurika (SADC) akaba na Perezida wa Namibia, Hage Geingob, yahishuye ko ubusabe bwa Leta y’u Burundi yifuza kuba umunyamuryango wayo bwanzwe kuko butujuje ibisabwa.

Mu kwezi gushize, Minisitiri w’ububanyi n’amahanga w’u Burundi, Ezechiel Nibigira, akaba n’intumwa yihariye ya Perezida Nkurunziza kuri icyo kibazo yasuye Hage Geingob amubwira ko bwiteguye kwakira muri Gicurasi itsinda rizajya kugenzura niba bwujuje ibisabwa ngo bube umunyamuryango wa SADC.

U Burundi bumaze igihe busaba kuba umunyamuryango ntibwemererwe kubera kutuzuza ibisabwa birimo kuba bwarasabwe gukemura ibibazo bya politiki bivugwa ko byazamuwe na Perezida Nkurunziza ubwo yiyamamarizaga manda ya gatatu mu 2015.

Ubwo yari yasuye mugenzi we John Magufuli kuri uyu wa 27 Gicurasi, Perezida Geingob yavuze ko u Burundi butaruzuza ibisabwa.

Ati “Itsinda rya SADC ryoherejwe kugenzura mu Burundi ariko kugera ubu ryatugaragarije ko butaragera aho kwemerera kuza muri SADC. Ibyo bishingiye ku buryo bwo kubahiriza demokarasi butarasobanuka.”

Perezida Geingob yavuze ko bari no kureba ku birego u Rwanda n’u Burundi bishinjanya bwo kwivangirana mu miyoborere y’imbere, avuga ko azashimishwa no kubona Magufuli agize uruhare mu kubikemura.

Mu nama ya SADC yabereye muri Tanzania mu 2013, yashyizeho amwe mu mabwiriza mashya ku gihugu gishaka kuba umunyamuryango, harimo kuba gifite imiyoborere myiza kandi cyubahiriza amategeko, kurangwamo demokarasi no kubahiriza uburenganzira bwa muntu.

Ubwo yahuraga na Perezida Geingob yakomeje gutsimbarara ko u Burundi ari igihugu gitekanye kandi gikurikiza amategeko ndetse ko Nkurunziza yagiye ku butegetsi binyuze muri Demokarasi.

U Burundi buri kwitegura andi matora ya Perezida biteganyijwe ko azaba mu 2020 ariko ngo Nkurunziza ntazayiyamamazamo.

Nkurunziza ashyirwa mu majwi ko ariwe ntandaro y'imvururu zabaye mu Burundi guhera 2015

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza