Ubushakashatsi bwerekanye ko ibimera bishobora kurwanya Malariya

Yanditswe na Evariste Nsengimana
Kuya 6 Nyakanga 2017 saa 10:32
Yasuwe :
0 0

Mu gihe Malariya n’izindi ndwara zihangayikishije isi, ni ko abashakashatsi barushaho gushaka uburyo buhamye n’ingamba zikomeye zo kuzirinda no kuzirwanya.

Itsinda ryakoreye inyigo mu duce icyenda two mu Karere ka Bandiagara muri Mali, ryatekereje ko uburyo bwo gukorera no kwita ku bimera hakurwamo bimwe mu bitunga imibu itera Malariya bwakwifashishwa mu kuyikumira.

Aho ubushakashatsi bwakorewe hari ibimera bidasanzwe bitunga imibu itera Malariya kandi bigaragara ku buso bunini ku mugabane wa Afurika.

Iki kimera gikomoka muri Amerika yo hagati n’iy’Amajyepfo, byabonetse bwa mbere muri Afurika ahayinga mu 1970 ubwo hahingwaga amashyamba ahari harabaye ubutayu. Ibi bimera bidasanzwe bimeze nk’ibiti bito bihabwa izina rya ‘Prosopis juliflora’, bibarurwa mu muryango w’ibyitwa ‘Fabaceae’ biri mu bwoko bw’imboga.

Impuguke zo muri Mali zifatanyije n’abashakashatsi bo muri Kaminuza y’Ubuvuzi ya Hebrew University of Hadassah muri Israel yigisha iby’ubuzima n’abo mu ya Miami muri Leta Zunze Ubumwe za Amerika bakoze ubushakashatsi, bagerageza gusoroma indabo z’ibyo bimera ngo barebe niba imibu ihari yahita ipfa.

BBC itangaza ko bahisemo ahantu icyenda muri ako karere basanga uduce dutandatu turimo ibyo bimera byinshi, muri two utugera kuri dutatu bakuyeho indabyo.

Bari bafite igitekerezo ko gusoroma indabo z’ibyo bimera bizagira ingaruka zikomeye zo kubura amazi aryohera yatungaga imibu ikuze ikicwa n’inzara. Iyo mibu y’ingore ikuze niyo iruma abantu ikabanduza Malariya.

Nyuma y’iminsi muri twa duce twose bifashishije agakoresho gafata imibu bashaka kugenzura niba koko imibu n’utundi tunyabuzima twafashwe twabasha kubaho tutabona ya mazi dukura mu ndabo. Basanze aho bari bakuye indabo za bya bimera, imibu myinshi yafatiwe muri ka gakoresho yacitse intege ndetse inagabanukaho hafi 60%.

Igitangaje abo bashakashatsi berekenye ni uko imibu ikuze y’ingore ari nayo itera Malariya basanze yagabanutse ku kigero kimwe n’icy’imibu yo mu duce dutatu tutarimo bya bimera.

Nubwo nta gihamya bagaragaza cyerekena icyishe kikanaca intege iyo mibu, abashakashatsi bagaragaje icyizere ko ya mibu ishobora kuba yarishwe no kubura ibyo irya nyuma yo gukuraho indabo kuri ibyo bimera.

Inararibonye mu gukumira no kurwanya Malariya muri Kaminuza yigisha iby’isuku mu Bwongereza, Prof. Jo Lines, avuga ko ubwo buryo bushobora kugira imbaraga ziruta gukoresha indi miti isanzwe yo kwica udusimba.

Prof Jo Lines asobanura ko ubu buryo bugoye kwizerwa cyane mu bihugu biri hafi y’umurongo wa Equateur ugabanyamo isi kabiri, ahiganje ibimera byifitemo amazi yifitemo isukari aryohera utwo dusimba.

Malaria iri mu ndwara zihitana ubuzima bwa benshi kuko imibare y’Umuryango w’Abibumbye wita ku Buzima yagaragaje ko miliyoni 212 mu 2015 bari bayirwaye, abagera ku bihumbi 429 000 bahitanwa nayo.

Ibimera bya 'Prosopis juliflora' byakoreweho ubushakashatsi bifatwa nk'indiri y'imibu itera Malariya

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza