Uganda: Abagera kuri 48 batawe muri yombi bazira kudashyigikira ko Museveni aguma ku butegetsi

Yanditswe na IGIHE
Kuya 23 Nzeri 2017 saa 11:47
Yasuwe :
0 0

Polisi ya Uganda yatangaje ko imaze guta muri yombi 48 badashyigikiye umugambi wo kuvugurura itegeko Nshinga mu buryo bwemerera Perezida Museveni kongera kwiyamamariza kuyobora iki gihugu muri manda itaha.

Abatawe muri yombi bazagezwa mu rukiko mu cyumweru gitaha barimo abanyeshuri 25 bo muri Kaminuza ya Makerere, bagiye bifatanya n’abandi mu bice bitandukanye bya Kampala bakamagana umugambi wo guharurira Museveni inzira yo kongera kwiyamamaza mu 2021.

Daily Nation yanditse ko abandi 23 bafashwe kuwa Gatatu no kuwa Kane mu mikwabu y’abapolisi n’abasirikare mu mihanda yo mu bice bya Kasangati, Natete, Ndeeba na Kampala. Abanyeshuri bo muri Kaminuza bafungiye ku cyicaro cya polisi cya Wandegeya naho abandi bafungiye ku cya polisi i Kampala.

Bamwe mu badepite bo mu ishyaka NRM rya Perezida Museveni, barashaka kuvugurura ingingo ya 102 y’Itegeko Nshinga itemera ko urengeje imyaka 75 yongera kwiyamamariza kuyobora igihugu.

Umuvugizi wa polisi, Asan Kasingye, yavuze ko abatawe muri yombi barimo kubazwa kandi abazagaragaraho ibimenyetso by’ibyaha bazajyanwa mu rukiko. Umuyobozi wa Polisi muri Wandegeya, Joseph Nsabimana, yavuze ko abanyeshuri bafashwe bazajyanwa mu rukiko kuwa mbere cyangwa kuwa kabiri.

Yavuze ko bakurikiranyweho ibyaha by’ihohoterwa kuko bakubise bakanatera amabuye abasivili n’abapolisi.

Perezida Museveni w’imyaka 73 yagiye ku butegetsi mu 1986, abatamushyigikiye bavuga ko ashaka kwiyamamariza indi manda mu matora yo mu 2021 kandi itegeko nshinga ritabyemera kuko azaba afite imyaka 76.

Abadashyigikiye ko Museveni aharurirwa inzira zo kuguma ku butegetsi bakomeje gutabwa muri yombi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza