Uganda: Abagore bacuruzwa ku mashilingi ibihumbi 20 i Luwero

Yanditswe na Mukaneza M.Ange
Kuya 17 Werurwe 2017 saa 07:22
Yasuwe :
0 0

Mu gace ka Luwero muri Uganda, hagaragaye ubucuruzi budasanzwe, aho umugabo wese wifuza gushinga urugo atanga ibihumbi 20 by’amashilingi, agahabwa umugore bitarenze icyumweru.

Abagore bari gucuruzwa muri ubu buryo ni abatuye ahitwa Busoga bajya gucururizwa ahitwa Bamunanika. Mu myaka itatu ishize abamaze gushyingirwa muri ubu buryo bagera ku 10. Kuva mu mwaka ushize kandi ngo abagiye kubana bagiye basabwa kubanza kwipimisha agakoko gatera SIDA.

Umunyamakuru wa The Newvision dukesha iyi nkuru avuga ko mu gace k’ubucuruzi ka Bamunanika, ariho yasanze umuranga w’aba bagore wamusobanuriye ko kugira ngo ube umubonye wishyura amashilingi ari hagati y’ibihumbi 20 na 50.

Aya mafaranga ngo akoreshwa ku bwishyu bw’urugendo umugore akora, rumwerekeza kureba aho umugabo atuye ndetse no mu gushyikirizwa umugore we mu gihe kitarenze icyumweru nyuma uhereye igihe yamuhitiyemo.

Umwe mu basaza bayobora umushinga wo gucuruza abagore, yavuze ko abakomoka Busoga baba bazi gukora no kubaka, ndetse yitangaho urugero kuko atunze babiri kandi kugira ngo ababone yatanze ibihumbi 100 by’amashilingi gusa.

Uwitwa Fred Walusimbi wabonye abagore babiri binyuze muri ubu bucuruzi, yavuze ko babanye neza kandi batinubira ubuzima babayemo.

Benshi mu bagore bashakwa muri ubu buryo, baba bari hejuru y’imyaka 30 kandi akenshi ari abapfakazi cyangwa baratandukanye n’abagabo babo. Hari n’ababa bafite abana bakabasiga iwabo cyangwa bakabazana mu ngo zabo nshya.

Nubwo abagabo babyishimiye ariko, abagore bo muri Bamunanika bo ntibabyakira neza kuko ngo umugabo iyo agusabye ko mubana ugatinda mu mayira ahita yishakira Umusoga.

Imiryango iharanira uburenganzira bwa muntu muri Uganda, ivuga ko niba ibivugwa ari ukuri koko, bakwiye gukurikiranwa ababikora bagahanwa, kuko uretse kuba ari ihohoterwa riri gukorerwa abagore n’abakobwa ni no gusubiza inyuma iterambere ry’igihugu.

Ishami rishinzwe kurwanya ubucuruzi bw’abantu muri Minisiteri y’umutekano ya Uganda, ryo rivuga ko nubwo nta muturage urabagezaho iki kibazo, biramutse ari byo cyaba ari icyaha kandi ko uwabikoze wese yagezwa imbere y’ubutabera.

Icyegeranyo ku bijyanye n’ubucakara mu 2016 (Global Slavery Index) cyagaragaje ko Uganda iri ku mwanya wa 20 mu bihugu bigaragaramo ibikorwa by’ubucakara.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza