Uganda: Abanyamakuru bamaganye ifungwa ry’abayobozi ba Red Pepper

Yanditswe na Mukaneza M.Ange
Kuya 12 Ukuboza 2017 saa 11:29
Yasuwe :
0 0

Ihuriro ry’abanyamakuru baharanira ubwisanzure bw’itangazamakuru muri Uganda ryamaganye itabwa muri yombi n’ifungwa ry’abayobozi b’ikigo Pepper Publications kibarizwamo Ikinyamakuru Red Pepper.

Mu ibaruwa ifunguye yanditswe ku itariki ya 8 Ukuboza 2017, iryo huriro "Press Freedom Network" ririmo abanyamakuru 230 ryamaganye ifungwa ry’Umuyobozi mukuru wa Red Pepper, Richard Tusiime; Ushinzwe kumenyekanisha ikigo, Arinaitwe Rugyendo; Patrick Mugumya ushinzwe ibikorwa; Johnson Musinguzi ushinzwe imari na James Mujuni ushinzwe ibikorwa by’ubucuruzi. Bafunganywe n’abanditsi b’ikinyamakuru batatu barimo Ben Byarabaha; Francis Tumusiime na Richard Kintu.

Abo batawe muri yombi nyuma y’inkuru yanditswe kuwa 20 Ugushyingo 2017, ivuga ko Perezida Museveni ari mu mugambi wo guhirika Perezida Kagame w’u Rwanda.

Ihuriro rigaragaza ko kuva mu myaka ishize abanyamakuru muri Uganda bagiye bafungwa bazira gukora akazi ariko kuri ubu igikomeye akaba ari uko n’abatari abanditsi batangiye kubizira, bakibaza impamvu umucungamutungo ashobora kuzira ibyemezo birebana n’ubwanditsi kandi byafatiwe mu ishami adakoramo.

Iyi baruwa iragira iti “Ibi bishobora kugira ingaruka ku bwigenge bw’ishami ry’abandika amakuru kuko abandi bayobozi bakuru barimo abashinzwe ubutegetsi, imari cyangwa kwamamaza bashobora gusaba kujya bagira uruhare mu gufata ibyemezo birebana n’ubwanditsi. Bashobora kugaragaza ko nabo bafite ibyago byo kuba bagezwa imbere y’ubutabera bazira inkuru twatangaje, bagahitamo kugira uruhare mu gufata ibyemezo kugira ngo bagabanye ibyo byago.”

Iyi baruwa ikomeza igaragaza ko bigenze bityo byazagira ingaruka mu gutuma itangazamakuru rigira ibyo ryanga gukoraho ku bushake, mu gihe inyungu z’abaturage zishyirwa imbere zigerwaho gusa iyo abanyamakuru bafite ubwisanzure bwo kuvuga ukuri no kugaragaza abayobozi badakora neza ibyo bashinzwe.

Ikomeza igira iti “Dufite ubwoba ko gahoro gahoro leta yagiye itwara umwanya itangazamakuru ryagakoreyemo ryisanzuye. Aho tugarutse ku kibazo cya Red Pepper, leta irashinja igitangazamakuru gushyira hanze amakuru ateye ikibazo ku mutekano w’igihugu ndetse no guhungabanya umutekano wa bamwe mu bayobozi bakuru barimo na Perezida.”

Kuva kuwa 21 Ugushyingo,Red Pepper n’ibindi bitangazamakuru biyishamikiyeho birimo na radiyo ntibikigaragara.

Nk’uko bigaragara muri iyi baruwa, iri huriro ry’abanyamakuru rigaragaza ko uburyo iki kibazo cyatwawemo budasobanutse, kuko ubusanzwe leta yari guhamagaza umwanditsi, aho guta muri yombi buri muyobozi no kumara amasaha 48 bataragezwa imbere y’urukiko.

“Duhangayikishijwe n’ibyaha bitandukanye abanyamakuru, abahanzi n’abandi baturage bagiye bashinjwa kuva mu myaka mike ishize. Kimwe muri byo ni ‘ukubuza umudendezo’ umuntu runaka.”

Muri iyi baruwa, inagaruka ku buryo abanyamakuru barimo aba New Vision, dail Monitor, Red Pepper, abahanzi n’ababakorera indirimo bagiye bafungwa bashinjwa kubuza umutekano Perezida Yoweri Museveni n’Umuyobozi mukuru wa polisi, Kale Kayihura, banerekanye uburyo babangamiwe n’itegeko rirebana no gukoresha mudasobwa nabi n’irihana icyaha cyo gusebanya ryagaragajwe nk’iribangamiye uburenganzira bwo gutanga ibitekerezo.

Aba banyamakuru bagaragaza ko uburyo Red Pepper yafunzwe bigaragaza ubushake bwa leta mu gupfukirana itangazamakuru, bavuga ko babajwe na bagenzi babo batigeze bahembwa mu gihe kuri ubu igihugu cyugarijwe n’ikibazo cy’ubukungu butifashe neza, ndetse akazi kakaba gakomeje kuba ingume.

Banahamya ko kandi urwandiko polisi yahawe rutayemereraga gufunga red Pepper, ndetse ko ibyakozwe ari nko kwereka abandi banyamakuru ibizababaho igihe batangaje ibyo abategetsi batifuza, nubwo batakwirengagiza ko hari abakora uyu mwuga bica amategeko.

Banagarutse no ku kuba urukiko rwarananiwe kwemerera abayobozi ba Red Pepper gufungurwa by’agateganyo hatanzwe ingwate, bakajyanwa muri gereza ya Luzira, aho bategereje kongera kuburana kuwa 18 Ukuboza.

Iyi baruwa isoza basaba polisi, Urwego rushinzwe itumanaho, Ubushinjacyaha bukuru gukemura iki kibazo mu butabera bunoze ndetse bagahamagarira Perezida Museveni kutemera ko intambwe nto Uganda yateye mu nzira ya demokarasi imuca mu myanya y’intoki.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza