Uganda: Abayobozi bane bahagaritswe ku kazi bakekwaho guhimba imibare y’impunzi

Yanditswe na Jean Pierre Tuyisenge
Kuya 9 Gashyantare 2018 saa 02:03
Yasuwe :
0 0

Abayobozi bane muri Guverinoma ya Uganda bahagaritswe ku kazi bakekwaho gutanga imibare y’impunzi irenze iziba muri icyo gihugu.

The Guardian yatangaje ko Komiseri ushinzwe impunzi muri Uganda, Apollo Kazungu, n’abandi bakozi batatu bakoranaga bari gukorwaho iperereza nyuma yo kugirana ibibazo n’Umuryango w’Abibumbye n’Ishami ryawo rishinzwe ibiribwa (PAM) ku byerekeye imibare n’inkunga zihabwa impunzi.

Daily Monitor yatangaje mbere icyo kibazo yavzue ko cyazamuwe n’Uhagarariye Loni muri Uganda, Rosa Malango, wagaragaje ibibazo bitatu birimo imibare y’impunzi ififitse, icuruzwa ry’abagore n’abana n’ikibazo cy’ubujura.

Hamwe hagenzuwe habonetse abantu 7000 gusa nyamara harasabirwaga inkunga y’abagera ku 26000, bikaba byaratumye hibazwa aho amafaranga n’ibikoresho by’abagera ku 19,000 byagombaga kujyanwa.

Uganda ivugwaho gucumbikira impunzi zigera kuri miliyoni 1.4 zatewe n’imvururu zadutse mu bihugu by’ibituranyi nka Repubulika Iharanira Demokarasi ya Congo na Sudani y’Epfo.

Umwaka ushize byatangajwe ko icyo gihugu ari cyo cyakiriye impunzi nyinshi kurusha ibindi byose ku Isi.

Nyuma y’ibyo, Leta Zunze Ubumwe za Amerika n’Umuryango w’Ubumwe bw’Igihugu by’i Burayi (EU), byatangaje ko bigiye kugabanya inkunga byageneraga icyo gihugu.

Umunyamabanga wa Leta muri Minisiteri ishinzwe impunzi n’ibiza muri Uganda, Musa Ecweru, yavuze ko hagiye gufatwa ingamba zikomeye mu guhangana n’icyo kibazo, akavuga ko bagiye kubarura impunzi hifashishijwe ikoranabuhanga ku mpunzi zose kugira ngo ntihazagire ubujura bwongera kugaragaramo.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza