Uganda: Gen Julius Oketta wari mu ngabo z’igihugu yitabye Imana

Yanditswe na Kanamugire Emmanuel
Kuya 5 Ugushyingo 2016 saa 07:29
Yasuwe : XX
0

Maj Gen Julius Oketta, wari umusirikare mu ngabo za Uganda, UPDF yitabye Imana, aho bikekwa ko yishwe n’umutima.

Oketta wari umuhuzabikorwa wungirije w’ibikorwa bigamije kuzamura ubukungu, yapfiriye mu bitaro bya Kadic biri mu mujyi wa Kampala muri iki gitondo, afite imyaka 60 y’amavuko nk’uko ikinyamakuru The Monitor cyabitangaje.

Umuvugizi w’ingabo za Uganda Lt. Col Paddy Ankunda yemeje iby’uru rupfu avuga ko abaganga batangiye gupima icyaba cyaruteye, gusa amakuru adafitiye gihamya aravuga ko ashobora kuba yishwe n’umutima.

Gen Oketta yigeze kuba umuyobozi ushinzwe w’ibiro bishinzwe guhuza ibikorwa mu by’ubutabazi bwihuse mu biro bya Minisitiri w’Intebe. Yigeze guhagararira ingabo za Uganda mu Nteko Ishinga Amategeko y’icyo gihugu. Iyo mirimo yiyongera ku yindi yagiye akora.

Kuva mu 1989 kugera mu 1993, yari umuyobozi w’ingabo muri diviziyo ya gatandatu y’ingabo ziharanira kubohora Uganda zitavugaga rumwe n’ubutegetsi bwa Milton Obote (National Resistance Army-NRA). Aho yaje kuva ajya mu ngabo za Uganda(UPDF).

Hagati ya 2001 -2003, yari umuyobozi ushinzwe ibikorwa n’ibikoresho mu ngabo za UPDF, ayobora Ibiro bishinzwe imikoranire y’ingabo za Uganda n’izindi nzego muri Sudani.

Mu bindi bikorwa yakoze harimo icyo kuba umuganga mu bikorwa by’ubutabazi byahuruje ingabo z’umuryango wa Afurika Yunze ubumwe zigiye gutabara abari bahuye n’icyorezo cya Ebola mu bihugu by’Afurika y ‘Iburengerazuba muri 2014, aho yaje guhabwa umudari w’icyubahiro na Perezida wa Liberia kubera uruhare rwe mu kurwanya Ebola.

Aheruka kumvikana mu ruhame avugira kuri radio Kfm ishami ryayo rya Uganda, ku kibazo cy’imyigaragambyo muri kaminuza ya Makerere n’ifungwa ryayo.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza