Uganda: Habuze amafaranga yo gushyira mu bikorwa itegeko ryo kurwanya itabi

Yanditswe na Uwishyaka Jean Louis
Kuya 10 Ukwakira 2016 saa 01:34
Yasuwe : XX
118 67

Hashize umwaka itegeko ryo kurwanya itabi muri Uganda risohotse mu igazeti ya Leta ngo ritangire gukurikizwa, ariko Umuyobozi mukuru muri Minisiteri y’Ubuzima, Dr Sheila Ndyanabangi, yatangaje ko nta mafaranga Guverinoma iratanga yo kwifashisha mu gushyira mu bikorwa ibiteganywa n’iryo tegeko.

Itabi ryica n’abatarinywa iyo bahumetse umwotsi waryo, nyamara muri Uganda abantu baracyarinywera mu ruhame.

Ku wa Kane w’icyumweru gishize, Dr Ndyanabangi yabwiye Ihuriro ry’Abagize Inteko Ishinga Amategeko bashinzwe iby’indwara zitandura, ko gushyira mu bikorwa ingamba ziteganywa n’iryo tegeko atari ibya vuba, bitewe no kubura amafaranga yo gukoresha mu gukusanya ibitekerezo abaturage barifiteho.

Ati “Sinigeze mbona amafaranga na make yo gukoresha mu nama nyunguranabitekerezo. Ni gute washyira mu bikorwa ingamba utabanje guhuza abantu ngo bazitangeho ibitekerezo? Dufite icyuho kuko nta mafaranga ahari yo gukoresha inama, Ministeri y’Ubuzima ifite icyumba cy’inama kimwe gikoreshwa mu buryo buhoraho kandi ku nyungu zitandukanye.”

Kugeza ubu Leta ya Uganda irimo gutegura izindi ngamba zo mu guhashya itabi barinda abaturage ububi bwaryo, aho harimo kwigwa uburyo icyo gikorwa cyakwinjizwamo n’izindi nzego, hakanashyirwaho Komite ishinzwe ishyirwa mu bikorwa ryazo.

Ndyanabangi ati “Itegeko ryamaze gusohoka, ariko ingamba zisaba kubanza gusobanura bimwe mu biteganywa na ryo n’amwe mu magambo aririmo."

Daily Monitor dukesha iyi nkuru ivuga ko Itegeko rigenzura ikoreshwa ry’itabi muri iki gihugu, ryatowe kuwa 28 Nyakanga 2015, rishyirwaho Umukono na Perezida Museveni ku wa 19 Nzeri, maze risohoka mu Igazeti ya Leta ku wa 18 Ugushyingo uwo mwaka nyuma y’uko ryemezwa n’Abagize Inteko Ishinga Amategeko.

Dr Ndyanabangi akomeza avuga ko bigoye guhindura abakinywera itabi mu ruhame, cyane ko na Polisi itajya ibafata. Yaboneyeho gusaba Abadepite gutanga umusanzu wabo, itabi rikongererwa imisoro ku kigero nibura cya 75% bityo igiciro cyaryo kikazamuka, maze abarinywa bakaba bagabanuka.

Michael Lulume Bayiga wahoze mu Nteko Ishinga Amategeko na we yasabye Abadepite kwirinda ko ishyirwa mu bikorwa ry’ingamba zakemura ikibazo cy’itabi byagirwa politiki, ahubwo hakitabwa ku kurinda ubuzima bw’abaturage.

Ati “Abadepite n’abafatanyabikorwa bose bakwiye kwita ku ngaruka mbi z’ikoreshwa ry’itabi. Abarenga 26% barware kanseri iba yaturutse ku itabi.”

Ibi yabivuze asaba Guverinoma y’iki gihugu kwirinda guha agaciro cyane inyungu ubucuruzi bw’itabi bwinjiriza igihugu.

Itegeko rigenga ikoreshwa n’icuruzwa ry’itabi muri Uganda riteganya ko ufashwe anywera itabi mu ruhame acibwa ihazabu cyangwa agahabwa igifungo kitarenze amezi atandatu (6) cyangwa akaba yanabihabwa byombi.

Iryo tegeko kandi rivuga ko ayo mabwiriza agomba kuba yanditse mu rurimi buri wese abasha kumva, harimo Icyongereza, Igiswahili cyangwa se Ikigande.

Itegeko rigenga ikoreshwa itabi ry'itabi muri Uganda ryaheze mu nyandiko kubera kubura amafaranga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE