Uganda: Kiiza Besigye n’umudepite wa EALA batawe muri yombi

Yanditswe na IGIHE
Kuya 26 Nzeri 2017 saa 09:33
Yasuwe :
0 0

Umunyapolitiki utavuga rumwe n’ubutegetsi bwa Uganda, Dr. Kiiza Besigye, kuri uyu wa Kabiri yatawe muri yombi mu mujyi wa Kampala, ubwo yajyaga kwifatanya n’abayoboke be mu kwamagana ivugururwa ry’itegeko Nshinga mu ngingo ya 102 ikumira abafite guhera ku myaka 75 kwiyamamariza kuyobora igihugu.

Daily Monitor yatangaje ko Besigye uhagarariye ihuriro ry’abaharanira impinduka muri Uganda (FDC), yanze gusohoka mu modoka ye biba ngombwa ko iterurwa na polisi yari iyobowe n’Umuyobozi wa polisi muri Kampala, Joseph Bakaleke, kugera kuri sitasiyo ya polisi.

Iki kinyamakuru gitangaza ko undi watawe muri yombi ari umudepite w’Inteko ishinga amategeko y’Umuryango wa Afurika y’Iburasirazuba (EALA), Fred Mukasa Mbidde, uhagarariye Uganda muri iyi nteko.

Uyu munsi nibwo byari biteganyijwe ko abadepite biga ku mushinga w’Itegeko rikura ingingo ya 102 mu Itegeko Nshinga. Ni umushingwa wazanwe na bamwe mu badepite b’ishyaka NRM riri ku butegetsi.

Basobanura ko bitagamije guha amahirwe Museveni yo gukomeza kuyobora igihugu ahubwo ari ku nyungu z’abayobozi b’ahazaza. Gusa abatavuga rumwe n’ubutegetsi bavuga ko ari umugambi wo guha amahirwe Museveni ngo yongere kwiyamamaza.

Perezida Museveni w’imyaka 73 yagiye ku butegetsi mu 1986, abatamushyigikiye bavuga ko ashaka kwiyamamariza indi manda mu matora yo mu 2021 kandi itegeko nshinga ritabyemera kuko azaba arengeje imyaka 75.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza