Uganda: Leta yahakanye iby’izimira rya Gen Makenga wayoboraga M23

Yanditswe na Uwishyaka Jean Louis
Kuya 14 Ugushyingo 2016 saa 09:57
81 44

Igisirikare cya Uganda cyatangaje ko uwahoze ari Umuyobozi Mukuru w’Umutwe w’Abarwanyi wa M23 barwanyaga ubutegetsi bwa Repubulika Iharanira Demokarasi ya Congo, Gen Sultan Makenga, aherereye i Kampala mu Murwa Mukuru w’icyo gihugu, bitandukanye n’amakuru yavugaga ko yaburiwe irengero.

Ibiro Ntaramakuru by’Abongereza, Reuters, bitangaza ko abarwanyi b’uyu mutwe bo baherereye mu Burengerazuba bw’iki gihugu.

Ku wa Gatandatu tariki ya 12 Ugushyingo 2016, Guverineri w’Intara ya Kivu y’Amajyaruguru muri Repubulika Iharanira Demokarasi ya Congo, Julien Paluku Kahongya, yatangaje ko Gen Sultan Makenga, yavuye muri Uganda aho yari yarahungiye akaba ari ahantu hatazwi.

Nyuma y’ayo makuru, Leta ya Congo yohereje ingabo zayo mu gace gaherereye mu Burasirazuba kamaze igihe karibasiwe n’imitwe yitwaje intwaro, bakeka ko yaba yitegura kugaba ibitero, ndetse mu Mujyi wegeranye n’umupaka uhuza ibihugu byombi humvikana urusaku rwinshi rw’amasasu.

Iyi nkuru ikomeza ivuga ko umuvugizi w’igisirikare cya Uganda, Paddy Ankunda, avuga ko aho Makenga aherereye hazwi neza.

Ati “ Makenga ari i Kampala na M23 iri muri Bihanga (ikigo cya gisirikare kiri mu Burengerazuba bwa Uganda). Umuntu wese ufite amakuru atandukanye n’ayo aribeshya.”

Paddy Ankunda kandi yahakanye ko hari ingabo za Uganda zashyizwe ku mupaka uhuza iki gihugu na Repubulika Iharanira Demukarasi ya Congo.

Kugeza mu mwaka wa 2013 ubwo ingabo yari ayoboye zatsindwaga n’iza Congo zifatanyije n’Iz’Umuryango w’Abibumbye, Gen Makenga yahungiye muri Uganda, bamwe mu bagize umutwe we bahungira mu Rwanda, abandi bamukurikira muri icyo gihugu.

Gusa hari abandi bafashwe mpiri bashyirwa mu kigo cya gisirikare kiri ku mupaka wa Uganda na Congo cyayoborwaga n’igisirikare cya Congo mu gihe bari bategereje ibiganiro by’amahoro, gusa Chimp Reports yanditse ko Makenga ashinja ingabo za Congo gutoteza no gukorera iyicarubozo abahoze ari abarwanyi be batashye ku bushake nyuma y’aho intambara ihagarariye.

Uburasirazuba bwa Repubulika Iharanira Demokarasi ya Congo bwakunze kwibasirwa n’imitwe yitwaje intwaro ndetse ikomeza guteza umutekano muke ku buryo byatumye abaturage batari bake bahasiga ubuzima abandi babarirwa mu bihumbi bahungira mu bihugu by’ibituranyi birimo n’u Rwanda.

Gen Makenga ngo aherereye i Kampala

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE