Uganda:Nyuma y’imvururu abadepite 322 banze kwitabira inteko rusange

Yanditswe na Ferdinand Maniraguha
Kuya 29 Nzeri 2017 saa 12:06
Yasuwe :
1 0

Umutuzo ni wo wigaragaje mu Nteko Ishinga Amategeko ya Uganda kuri uyu wa Kane, nyuma yo guhagarika by’agateganyo abadepite 25 bigatuma na bagenzi babo banga kugaruka.

Kuwa Gatatu Perezida w’Inteko muri Uganda, Rebecca Kadaga yahagaritse abadepite 25 iminsi itatu batitabira imirimo y’inteko nyuma yo guteza akavuyo hakaba imirwano yakomerekeje bamwe.

Abadepite batavuga rumwe n’ubutegetsi baharaniraga ko hadatangizwa imbanzirizamushinga igamije kuvanaho ingingo igena imyaka Perezida atagomba kuba arengeje ngo ayobore icyo gihugu.

Nyuma yo guhagarika by’agateganyo abo badepite kuwa Gatatu, abatavuga rumwe n’ubutegetsi barigaragambije, barasakuza, bararwana banangiza ibikoresho by’Inteko Ishinga Amategeko.

Hitabajwe Polisi kugira ngo akavuyo gahagarare, bamwe mu badepite batabwa muri yombi ndetse n’Inteko rusange irasubikwa.

Kuri uyu wa Kane inteko rusange yasubukuwe.Nubwo abatavuga rumwe na Leta baharaniraga ko imbanziriziamushinga ku kuvanaho imyaka Perezida agomba kuba atarengeje itatangazwa, byarangiye itangajwe kuri uyu wa Kane benshi mu badepite badahari.

Ubusanzwe Uganda ifite abadepite 449 ariko byageze saa munani kuri uyu wa Kane inteko irimo abadepite 30 Nkuko Daily Monitor ibitangaza, mu gihe kuwa Gatatu kuri izo saha hari abadepite basaga 200.

Inteko rusange yari iteganyijwe saa munani, yigijwe inyuma ishyirwa saa cyenda kubera ko abadepite bari bake,nabwo itangira hari 127.

Gukoma amashyi, kuririmba no kwambara udutambaro tw’umutuku ku batavuga rumwe na Leta ntibyagaragaye kuri uyu wa Kane.Nyuma yo gutangira kw’imirimo y’inteko rusange, bake mu badepite batavuga rumwe na Leta bari baje nabo bahise basohoka, bavuga ko bazagaruka nyuma y’iminsi itatu ubwo bagenzi babo bahagaritswe bazaba bagarutse.

Ingingo ya 102 y’Itegeko Nshinga rya Uganda ivuga ko uyobora icyo gihugu agomba kuba atari munsi y’imyaka 30 kandi ntabe arengeje imyaka 75. Perezida Museveni uriho ubu manda ye izarangira mu 2021 afite imyaka 73 bivuze ko ingingo idahinduwe ataba acyemerewe kwiyamamaza.

Inteko Rusange yari yitabiriwe n'abadepite bake nyuma y'imvururu zabaye mu y'ubushize bigatuma bamwe bahagarikwa by'agateganyo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza