Umugabo wiswe ‘Impyisi’ ufite Sida yahamijwe icyaha cyo gusambanya abapfakazi

Yanditswe na Philbert Girinema
Kuya 19 Ugushyingo 2016 saa 01:23
Yasuwe : XX
0

Umunyamalawi ubana n’ubwandu bw’agakoko gatera SIDA, Eric Aniva wiswe “Impyisi”, yahamijwe icyaha cyo gukorana n’abapfakazi imibonano mpuzabitsina idakingiye, ndetse hategerejwe ko urukiko rutangaza igihano rwamukatiye.

Aniva uri mu kigero cy’imyaka 40 akaba atuye mu gace ka Nsanje, azamenyeshwa igihano agomba guhabwa nyuma yo guhamwa n’ibyaha byo gusambanya abapfakazi, akabura umushinja ibyaha byo gusambanya abana n’ubwo na byo yabiregwaga.

Aniva yatawe muri yombi muri Nyakanga uyu mwaka, bitegetswe n’Umukuru w’Igihugu wa Malawi, Peter Mutharika, nyuma yo gushavuzwa n’ibyo bikorwa uwo mugabo wiswe “Impyisi” akora.

Muri Nyakanga, Aniva yatangarije BBC ko asambanya abana kandi yaranduye virusi itera Sida, akishyurwa n’ababyeyi babo mu muco bafata nk’umugenzo wo “kubahumanura”, akaba yaratangiye ibyo bikorwa mu 1985.

Ubuhamya bwatanzwe n’abakora iyo migenzo bavuze ko mu guhumanura hadakoreshwa agakingirizo, ibintu bishobora gukongeza indwara z’ibyorezo nka Virusi itera Sida, zikaba uruhererekane mu cyaro.

Yavuze ko ahamagarwa n’abaturage agasambanya abana b’abakobwa bakimera amabere, bo bakabifata nko kubinjiza mu cyiciro cy’abakuru.

Mu gace ka Nsanje aho Aniva atuye, nk’iyo umugabo apfuye umugore we abanza kuryamana na Aniva mbere yo kumushyingura, umugore yakuramo inda bigasaba ko nabwo abanza “kwihumanura” aryamana n’uwo mugabo mbere yo kugira ikindi akora.

Igikomeye kurusha ibindi ni uko ku bakobwa b’abangavu nyuma yo kujya mu mihango bwa mbere, basabwa kuryamana n’uwo mugabo mu gihe cy’iminsi itatu, bo bakabifata nk’umuhango wo kubinjiza mu kindi cyiciro cy’ubukure, mu gihe bitakozwe bigafatwa ko hari ibyago cyangwa icyorezo gishobora kuzaza kikibasira umuryango wose.

Yanavuze ko amaze gusambanya abakobwa n’abagore bagera ku 104 n’ubwo atibuka umubare w’abo yateye inda.

Aniva yagize ati “Abenshi mu bakobwa twaryamanye ni abana bakijya ku ishuri, bafite imyaka nka 12, 13. Bose bishimira kuryamana n’impyisi yabo. Baba babyishimiye bakabwira n’abandi bantu bati ‘uyu mugabo azi gushimisha umugore’.”

Mu gace atuyemo kugira ngo umugabo nk’uwo aryamane n’umugore cyangwa umukobwa ngo bamwishyura hagati y’amadolari $4 na $7, ni hagati ya 3000 Frw na 5500 Frw.

Umugabo wiswe ‘Impyisi’ ubana n’ubwandu bwa Sida yahamijwe icyaha cyo gusambanya abapfakazi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza