Kwamamaza

Umwami wa Maroc, Mohammed VI mu ihurizo ryo kugarura igihugu cye muri AU

Yanditswe kuya 2-11-2016 saa 07:16' na Cyprien Niyomwungeri


Mu minsi hafi 40 Maroc itanze ubusabe bwo kugaruka mu Muryango wa Afurika Yunze Ubumwe, AU, Umwami wayo Mohammed VI, yagaragaje ko ahangayikishijwe cyane no kuba ubusabe bwe butaragezwa ku bihugu binyamuryango bizabufataho icyemezo muri Mutarama 2017.

Umwami Mohammed VI, ejo kuwa Mbere tariki 31 Ukwakira 2016, yatunguranye afata icyemezo cyo gusubika urugendo yari afite muri Ethiopia, ndetse agahamagara n’Umuyobozi w’Umuryango wa Afurika Yunze Ubumwe, AU, ngo amufashe ku busabe bw’igihugu cye bwo kugaruka mu muryango.

Nyuma yo gusura u Rwanda na Tanzania, Umwami Mohammed VI yagiye mu biruhuko mu kirwa cya Zanzibar, ari naho yahamagariye kuri telefoni Perezida Idriss Déby Itno, amusaba ko abwira Umuyobozi wa Komisiyo ya AU, Nkosazana Dlamini Zuma akamenyesha ibihugu binyamuryango, ko igihugu cye cyasabye ko gishaka kugaruka muri AU.

Kuwa 22 Nzeri 2016, nibwo Umujyanama w’Umwami Mohammed VI mu by’Ububanyi n’Amahanga Taieb Fassi Fihri, yahuriye muri Leta zunze Ubumwe n’Umuyobozi wa Komisiyo ya AU, Dr. Nkosazana Dlamini Zuma, mu nama ya 71 y’Inteko Rusange y’Umuryango w’Abibumbye, amushyikiriza kopi y’ibaruwa isaba gusubira muri AU nyuma y’imyaka 32 bawivanyemo.

Kuwa 22 Nzeri, Maroc yashyikirije Dr.Nkosazana impapuro zo kugaruka muri AU

Ubundi biteganyijwe ko Umuyobozi wa Komisiyo ya AU ahita yoherereza ubutumwa ibihugu binyamuryango abimenyesha ko Maroc yasabye byemewe n’amategeko kugaruka mu muryango, kugira ngo byitegure kuzatorera icyo cyemezo mu nama itaha izabera i Addis Abeba muri Ethiopia.

Icyakora amakuru Jeune Afrique ikesha umwe mu badipolomate ba Cameroon, ni uko igihugu cye kitarabona ubwo busabe bwa Maroc, bigakekwa ko kuba Dr. Nkosazana atinza iyo dosiye bifitanye isano n’uko asanga ko agace ka Sahara y’Uburengerazuba (Sahrawi) katava mu muryango nkuko bisabwa na kiriya gihugu.

Kuki Umwami atakigiye muri Ethiopia

Umwami Mohammed VI yari yateguye uruzinduko muri Afurika y’Iburasirazuba, aho yagombaga gusura u Rwanda, Tanzania na Ethiopia, kugira ngo baganire ku ngingo zirimo politiki no gutangiza ubufatanye mu by’ubukungu.

Abandi bayobozi baramuganirije ariko bitunguranye ku munsi w’ejo ahamagara Minisitiri w’Intebe wa Ethipoia, Hailemariam Desalegn, amumenyesha ko yimuye uruzinduko yagombaga kugirira muri kiriya gihugu. Yamusezeranyije ko rushobora kubaho nyuma y’inama yiga ku mihindagurikire y’ikirere, COP22 izabera i Marrakech kuwa 7-8 Ugushyingo uyu mwaka.

Ethiopia ifite icyicaro cya AU, niyo izakira inama y’abakuru y’uwo muryango iteganyijwe muri Mutarama umwaka utaha. Hari abasanga kuba umwami yasubitse uruzinduko rwe ku bushake kugira ngo ashyire umutima ku kugarura igihugu cye muri AU.

Ubusabe bwa Maroc mu rujijo

Kuva mu 1984 Maroc ntiyahwemye gushyiraho amabwiriza ivuga ko itagaruka mu muryango ukibarizwamo agace ka Sahara y’Uburengerazuba, kuko itemera ko kigenga dore ko nta wundi muryango mpuzamahanga ukemera nk’igihugu.

Ku rundi ruhande ariko isa n’iyahinduye umuvuno wo gushaka mbere na mbere kugaruka muri AU, ubundi ikaboneraho gushyira igitutu ku bihugu binyamuryango, ngo byirukane Sahara y’Uburengerazuba.

Ni ibintu biteye urujijo kuko no mu nama ya 27 ya AU iherutse kubera i Kigali, Idriss Déby Itno, yavuze ko nta mpamvu yatuma Maroc itakirwa mu muryango kandi bizoroha ko ibihugu bibyemeza. Icyakora yagarutse ku ngorabahizi ishobora kubamo ariyo kuvana agace ka Sahara y’Uburengerazuba mu muryango, kuko hari ibihugu bidashyigikiye kukavanamo.

Muri iriya nama ibihugu 28 kuri 54 bigize umuryango byasinye ku nyandiko y’ubusabe bw’uko agace ka Sahara y’Uburengerazuba kavanwa mu muryango. Biracyagoranye kuko amahame agenga AU avuga ko ari ngombwa ko ibihugu umunani byiyongera ku byasinye kugira ngo bibe bibiri bya gatatu by’ibihugu byose, bityo icyemezo cyubahirizwe.

Idriss Deby yasobanuye ko ibihugu birimo Afurika y’Epfo bitewe ubwoba n’uko Maroc niyakirwa mu muryango izateza ikibazo ishaka ko Sahara y’Uburengerazuba isohokamo.

Bisobanuye ko ubukana bw’inzitizi zo kugaruka kwa Maroc muri AU, bushingiye ku kibazo cya Sahara y’Uburengerazuba.

Maroc yivanye mu Muryango w’Ubumwe bwa Afurika ucyitwa OUA mu 1984 nyuma y’uko wari umaze kwakira Repubulika ya Sahara kandi igenzurwa na yo [Maroc]. Leta ya Sahara yashinzwe na Polisario,ishyaka ryaharaniraga ubwigenge bwa Sahara (Saguia el Hamra) na Rio de Oro muri Maroc.

Yizeye ko nigarukana umwanya wayo mu muryango izabasha kumvisha ibindi bihugu ko Sahara y’Uburengerazuba iwuvamo. Ibi ikaba yaratangiye kubikora yiyegereza ibihugu binyuranye, mu buryo bw’ingendo Umwami Mohammed VI yagiriye mu Rwanda, Tanzania n’ahandi ateganya.

Umwami Mohammed VI akomerewe no kugarura igihugu cye muri AU

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 3 Ukuboza 2016
Copyright © 2009 -2014 - IGIHE Ltd - All Rights Reserved