Amerika yababajwe n’abanyamakuru bo muri Uganda bakurikiranyweho kugambanira igihugu bandika ku Rwanda

Yanditswe na IGIHE
Kuya 30 Ugushyingo 2017 saa 06:36
Yasuwe :
0 0

Leta Zunze Ubumwe za Amerika , zavuze ko zihangayikishijwe no kuba hari abanyamakuru muri Uganda batawe muri yombi, bakekwaho kugambanira igihugu.

Ibi bivuzwe nyuma y’iminsi itanu abayobozi ndetse n’abanyamakuru batatu b’ikinyamakuru Red Pepper bafashwe, bashinjwa kwandika inkuru ivuga ko Perezida Museveni ari gutegura mu ibanga kuzakuraho uw’u Rwanda.

Nk’uko inkuru ya Africanews ibivuga, Umuvugizi wa Minisiteri y’ububanyi n’amahanga ya Amerika, Heather Nauert, abinyujije kuri Twitter, yanditse ko iki gihugu kitazateshuka ku mugambi wo guharanira ubwisanzure bwo gutanga ibitekerezo n’ubw’itangazamakuru muri rusange.

Yagize ati “Duhangayikishijwe n’ibirego byo kugambanira igihugu bishinjwa abanyamakuru umunani bo muri Uganda bakorera igitangazamakuru cy’imbere mu gihugu. Dukomeje gushyigikira ubwisanzure bwo gutanga ibitekerezo n’ubw’itangazamakuru nk’intego ikomeye ya politiki y’ububanyi n’amahanga ya Leta Zunze Ubumwe za Amerika.”

Abayobozi batanu n’abanditsi bakuru batatu b’ikinyamakuru Red Pepper gikorera muri Uganda, bakurikiranyweho icyaha cyo kugambanira igihugu mu nkuru baheruka kwandika ivuga ko Perezida Museveni wa Uganda, ari gutegura mu ibanga kuzakuraho uw’u Rwanda, Paul Kagame.

Aba bayobozi barimo uwitwa Arinaitwe Rugyendo, Patrick Mugumya , Johnson Musinguzi, Richard Tusiime na James Mujuni n’abanditsi bakuru barimo Ben Byarabaha, Richard Kintu na Francis Tumusiime.

Itangazo ryashyizwe hanze n’Ubushinjacyaha rishingiye ku iperereza ry’ibanze rigaragaza ko abayobozi n’abanditsi bakuru ba Red Pepper bazakurikiranwaho ‘ibyaha birimo gutanga amakuru aharabika no kubuza umudendezo Perezida Museveni; Salim Saleh na Minisitiri w’Umutekano, Henry Tumukunde. Icyaha gikomeye bashinjwa ni ubugambanyi’.

Igitabo cy’amategeko ahana ibyaha muri Uganda giteganya igifungo kitarenze imyaka irindwi ku muntu uhamwe n’ibyaha birimo icyo kwandika cyangwa gutangaza mu gitabo, mu nkuru n’ahandi, amakuru y’ibinyoma arebana n’ibikorwa, ingamba, ingendo bya gisirikare, aho ingabo ziherereye cyangwa zibika ibikoresho n’ibindi bishobora guteza umutekano muke mu gihugu.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza