Zimbabwe: Igisirikare cyafashe ubutegetsi

Yanditswe na Herve Ugirumukunda
Kuya 15 Ugushyingo 2017 saa 08:01
Yasuwe :
1 1

Igisirikare cya Zimbabwe cyatangaje ko cyafashe ubutegetsi, kivuga ko kiza kubusubiza kimaze gufata abanyamakosa ba hafi ya Perezida Mugabe.

Mu gicuku cyo kuri uyu wa Gatatu, humvikanye amasasu menshi mu gace ka Borrowdale mu Majyaruguru y’Umurwa Mukuru, Harare aho Perezida Mugabe atuye.

Mu ijoro ryakeye abasirikare bateye inyubako ikoreramo televiziyo ‘ZBC’. Hashize amasaha make umwe muri bo Gen. Maj. SB Moyo, umugaba w’ingabo ushinzwe ibikoresho, asomera itangazo kuri televiziyo rivuga ko batahiritse burundu guverinoma kandi ko Perezida Mugabe ari amahoro.

Ati “Turagira ngo tubwire igihugu ko Nyakubahwa Perezida n’Umuryango we bameze neza kandi ko umutekano wabo ushinganye.”

Yakomeje agira ati “Dushaka abanyamakosa bamukikije bari gukora ibyaha […] bagateza ibibazo mu mibereho myiza n’ubukungu by’igihugu. Niturangiza akazi kacu twiteze ko ibintu bisubira mu buryo.”

Reuters ivuga ko Minisitiri w’Imari, Ignatius Chombo yafashwe, yari ari umwe mu bakuriye agatsiko kiyita G40 kayobowe n’umugore wa Perezida Grace Mugabe.

Ambasade y’u Bwongereza i Harare yasabye Abongereza bari muri icyo gihugu kuguma imuhira kugeza ubwo umutekano ugaruka.

Naho iya Leta Zunze Ubumwe za Amerika yavuze ko iraba ifunze kuri uyu wa Gatatu.

Mu ntangiriro z’iki cyumweru nibwo umugaba w’ingabo za Zimbabwe Gen. Constantino Chiwenga yavuze ko igisirikare kigiye gukemura amatiku arangwa mu ishyaka rya Robert Mugabe, Zanu PF.

Ni nyuma y’uko Mugabe yari yirukanye Visi-Perezida Emerson Mnangagwa mu cyumweru gishize. Ku wa Kabiri ibintu byakomeje gufata indi ntera ibifaru bine bigaragara ku mihanda hafi y’Umujyi wa Harare.

Gufata televiziyo y’igihugu bibaye hashize amasaha make Zanu PF ishinje Umugaba w’Ingabo ubugambanyi.

Ikindi kandi bivugwa ko abakozi bamwe ba ZBC bahutajwe ubwo abasirikare bafataga iyi televiziyo. Babwiwe ko ‘badakwiye kugira impungenge’ kuko abasirikare baje kurinda iyo nyubako gusa.

Perezida Mugabe, w’imyaka 93 yirukanye Visi-Perezida Mnangagwa, umwe mu bagize uruhare mu rugamba rwo kubohora Zimbabwe, amuziza gushaka kuzamusimbura mu gihe apfuye.

Mnangagwa yari mu bahabwaga amahirwe yo kuzasimbura Mugabe kuko ari umwe mu bakomeye mu gihugu, akanagirana umubano wihariye n’igisirikare.

Ibi byaje guteza amakimbirane hagatiye n’umufasha wa Perezida, Grace Mugabe, binacamo ibice Zanu PF.

Gen. Maj. SB Moyo wasomye itangazo rivuga ko ZBC yafashwe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza