Zimbabwe: Perezida Mnangagwa yijeje umutekano n’ubumwe nyuma y’imvururu zakurikiye amatora

Yanditswe na Evariste Nsengimana
Kuya 4 Kanama 2018 saa 08:55
Yasuwe :
0 0

Perezida mushya wa Zimbabwe, Emmerson Mnangagwa, yasezeranyije abaturage be ko azabera bose umuyobozi mwiza, asaba ko nabo bakomeza kubumbatira ubumwe nyuma y’imvururu zakurikiye itanganzwa ry’intsinzi ye.

Kuri uyu wa Gatanu nibwo Komisiyo y’Amatora yatangaje ko Mnangagwa, wari warasimbuye Robert Mugabe by’agateganyo, yatorewe kuyobora Zimbabwe n’amajwi 51%, ahigitse Nelson Chamisa ukuriye Ishyaka ritavuga rumwe n’ubutegetsi rya MDC, wagize amajwi 44%.

Iyi ntsinzi ya Mnangagwa w’imyaka 75, yaje ikurikira ubwiganze bw’ishyaka rye Zanu-PF mu matora y’Abadepite, ntibyakiriwe neza n’abatavuga rumwe n’ubutegetsi binubiye ko habayemo uburiganya, biteza imvururu zaguyemo abantu batandatu.

Perezida Mnangagwa yasabye abaturage kurangwa n’amahoro, abasezeranya gukora iperereza mu nzego z’umutekano ku bagizigizemo uruhare bose.

Mnangagwa akimara gutorwa yanditse kuri Twitter ati “Mwakoze banya-Zimbabwe, nishimiye gutorerwa kuyobora Repubulika ya Kabili ya Zimbabwe. Nubwo twari dutandukanye mu matora, dushyize hamwe mu nzozi zacu.”

Perezida Mnangagwa yabwiye itangazamakuru ko Chamisa w’imyaka 40, afitiye igihugu akamaro, amusaba ubufatanye mu gushakira amahoro, ubumwe Zimbabwe no kubungabunga ukwishyira ukizana kw’abaturage.

Ati “Ndashaka kubwira Nelson Chamisa nti ‘ufitiye akamaro gakomeye Zimbabwe muri iki gihe n’ahazaza hayo heza. Reka dushyire hamwe duharanire amahoro n’ubumwe bw’igihugu cyacu.”

Chamisa yamaganiye kure ibyavuye mu matora avuga ko yabayemo uburiganya, ndetse ko atazabyemera kuko ngo afite ibyemeza ko amajwi yabaruriwe ahantu hatuma yibwa.

Mnangagwa yakomeje kwamagana ubwo bugizi bwa nabi bwatutumbye nyuma y’itangazwa ry’amajwi, agaragaza ko arajwe ishinga no kuzahura ubukungu bw’igihugu bivugwa ko bwaguye mu manga ku ngoma ya Mugabe, ndetse n’ikigero cy’abashomeri kigera kuri 90% umwaka ushize nk’uko BBC yabitangaje.

Perezida Mnangagwa yijeje ubumwe n'umutekano asaba uwo yatsinze gushyira hamwe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza