Bujumbura : Isoko rikuru ryaragurumanye indege z’u Rwanda ziratabara

Mu rukerera rwo kuri iki cyumweru tariki ya 27 Mutarama, isoko rikuru ryo mu mujyi wa Bujumbura rwagati ryibasiwe n’inkongi y’umuriro rirashya rirakongoka ku buryo nta kintu cyashoboye kurokorwamo.

Amakuru dukesha bagenzi bacu bakorera IGIHE i Bujumbura, ni uko iryo soko ryafashwe n’inkongi y’umuriro mu ma saa kumi n’imwe n’igice zo mu rukerera ariko icyabiteye ntikiramenyekana. Imodoka zizimya umuriro ebyiri zashoboye gutabara ariko biba iyanga. Abashoboye kugira ibintu barokora ngo ni abacururiza hanze y’isoko, ab’imbere bo ntawashoboye kwinjiramo.

Polisi y’Igihugu cy’u Burundi yatabaye ariko icyo ikora ni ugucunga umutekano babuza abantu kwinjira muri iyo nkogi y’umuriro bashaka gusahuramo ibintu. Bagenzi bacu bakomeza badutangariza ko uko ikomeje gukaza umutekano ariko umuriro na wo urushaho gukaza ubukana.

Ikindi ni uko kugeza ubu tubagezaho iyi nkuru, Sitasiyo ya Essence ya Kobil iri haruguru y’isoko hafi ya Banki MITEC na yo yamaze gufatwa, bakaba bafite impingenge ko bishobora gusatira umujyi wose.

Isoko rikuru rya Bujumbura ngo ryaba ricururizamo abantu bagera ku bihumbi icumi.

Muri iyo nsanganya umugore umwe yahasize ubuzima, umubare w’abakomeretse ariko ukaba utaramenyekana mu gihe hari abarwanaga bashaka gukuramo ibintu. Amakuru avuga ko uwo mugore witabye Imana yari agiye gukuramo amafaranga yari yasizemo.

N’ubwo Polisi y’u Burundi yatabaye n’imodoka ebyiri zizimya umuriro n’indi yatanzwe n’ibiro by’Umuryango w’Abibumbye mu Burundi, nta cyo byatanze bituma hitabazwa indege ebyiri za Kajugujugu z’u Rwanda zishobora guhashya ubukana bw’iyo nkongi.

Imwe mu ndege za Kajugujugu zatabaye i Burundi irimo kuzimya umuriro

Guverinoma y’u Burundi yashyizeho Komisiyo iyobowe na Visi Perezida wa Kabiri w’u Burundi, Gervais Rufyikiri, kugira ngo bakore iperereza ku cyateye iyo nkongi y’umuriro.

Visi Perezida wa mbere Therence Sinunguruza yatangarije itangazamakuru ko nyuma yo kumva iyo nkuru mbi hahise haterana inama ikomeye y’igitaraganya yo gushyiraho iyo komisiyo. Asaba abaturage kuyifasha kubona amakuru ya ngombwa, kandi Guverinoma izafata mu mugongo abahuye n’ingorane zakomotse kuri iyo nkongi y’umuriro.

Perezida w'u Burundi n'abandi bayobozi bakuru b'igihugu bareba ibyabaye

Inkongi y'umuriro ikomeje ubukana

Abacururiza hanze ni bo bagize ibyo barokora

Abantu mu mujyi ntibaziicyo bari bukore ngo bahagarike iyo nkongi y'umuriro

Video y’isoko rya Bujumbura ririmo gushya

Amafoto : Jean de Dieu Mbabazi/Bujumbura