DRC : Abarwanyi 6 ba FDLR baguye mu mirwano hagati yabo n’ingabo za Leta

Mu ijoro ryo kuri iki Cyumweru rishyira iryo ku wa mbere abarwanyi 6 b’umutwe witwara gisirikare wa FDLR bahitanwe n’imirwano yari ishyamiranyije ingabo za Leta FARDC ndetse n’uwo mutwe.

Ibi bikaba byabereye mu Ntara ya Kivu y’Amajyepfo ho mu gace ka Walungu.

Nk’uko umuyobozi w’ingabo mu Ntara ya Kivu y’amajyepfo General Pacifique Masunzu abitangaza,muri iyo mirwano,abarwanyi bane b’umutwe witwara gisirikare wa FDLR bahise bishyira mu maboko y’ingabo za Leta ya Congo naho abandi bagera kuri cumi na batanu bafatwa mpiri n’ingabo za Leta.

Nk’uko Radio Okapi ibitangaza, General Pacifique Masunzu akomeza atangaza ko intego y’ingabo za Leta ya Congo ari ugukora ibishoboka byose bagakura abarwanyi b’uwo mutwe muri ako gace ka Walungu dore ko ngo kamaze igihe kitari gito karigaruriwe n’umutwe wa FDLR.

Yanongeyeho kandi ko ingabo za Leta ya Congo zizakomeza kugaba ibitero simusiga kuri FDLR mu duce twa Mwenga, Fizi, Walungu ndetse na Kalehe.

Iyi mirwano hagati y’ingabo za Leta na FDLR ibaye mu gihe ku munsi wa Gatandatu, bamwe mu bayobozi bakuru mu ngabo za Leta ya Congo, batangaje ko abarwanyi bane b’umutwe w’abamayimayi (Maï-Maï ) bishwe na FARDC, aba bakaba bariciwe mu duce twa Lumbishi na Chambombo ho mu karere ka Kalehe.

FDLR ndetse na Maï-Maï ikaba ari imwe mu mitwe ikomeje guhungabanya umutekano w’ibintu n’abaturage muri Kivu y’Amajyepfo.