Gen Sultani Makenga yavuye ku izima

Gen Sultani Makenga yavuye ku izima


Yanditswe kuya 27-11-2012 - Saa 13:07' na Emile Nsabimana

Nyuma y’ibiganiro byabereye i Kampala muri Uganda hagati y’abagaba bakuru b’ingabo zo mu karere k’Ibiyaga Bigari, umukuru w’igisirikare cy’umutwe wa M23 urwanya leta ya Repubulika Iharanira Demokarasi ya Congo Sultani Makenga yemeye kuvana ingabo ze mu mijyi ya Goma na Sake.

Amakuru atangazwa y’ibiro ntaramakuru by’u Bwongereza Reuters, avuga ko aya makuru yemejwe n’umugaba mukuru w’ingabo za Uganda Aronda Nyakayirima.

Umugaba mukuru w’ingabo za Uganda avuga ko kandi M23 yemeye guhagarika ibikorwa byo kwigarurira utundi duce muri Congo, ibi bikaba bibaye nyuma y’ibiganiro Makenga yari arimo kuri uyu wa mbere i Kampala n’abagaba bakuru b’ingabo zo mu karere.

"Twabonanye mu ijoro ryacyeye mubwira iby’icyemezo cy’abayobozi bo mu karere cyo ku wa gatandatu. Yemeye gukura ingabo ze i Sake n’i Goma, no guhagarika ibikorwa byo kwigarurira utundi duce." Uku ni ko umugaba mukuru w’ingabo za Uganda yabwiye Reuters.

Yongeyeho ati "Ntagomba kugira ibyo asaba [Makenga] kuko azi ko ibyo M23 isaba bizahabwa agaciro na CIRGL [Inama mpuzamahanga ku Biyaga Bigari] nk’uko imyanzuro y’inama ya Kampala ibigaragaza."

Inama Mpuzamahanga ku karere k’Ibiyaga Bigari yarimo abakuru b’ibihugu byo mu karere k’Ibiyaga Bigari yabaye ku ya 24 Ugushyingo 2012 i Kampala muri Uganda, yasabye abarwanyi ba M23 kuva i Goma mbere y’itariki ya 27 Ugushyingo 2012 bakajya ku bilometero nibura 27 mu majyaruguru y’uyu mujyi.

M23 ntiyahise yitabira gushyira mu bikorwa iki cyemezo, na cyene ko yavugaga ko ibiganiro yari kugirana na Perezida Kabila bucyeye bwaho ku cyumweru bitabaye kuko Kabila atagaragaje ubushake bw’uko biba agahita yisubirira muri Congo.

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO