Guteza imbere umugore ni uguteza imbere igihugu cyose - Perezida Kagame

Guteza imbere umugore ni uguteza imbere igihugu cyose - Perezida Kagame


Yanditswe kuya 27-01-2013 - Saa 07:19' na IGIHE

Mu nama ya 18 ya gahunda ibihugu bya Afurika byashyizeho yo gusuzumana hagati yabyo aho bigeze mu miyoborere (African Peer Reveiew Mechanism) yabereye i Addis-Abeba muri Ethiopia, ku wa 26 Mutarama 2013, Perezida Paul Kagame yagaragaje ko umugore afite uruhare runini mu iterambere ry’Igihugu cyose.

Perezida Kagame yitabiriye iyo nama ya 18, mbere y’inama ya 20 iza guhuza abakuru b’ibihugu na za guverinoma zigize Umuryango w’Afurika Yunze Ubumwe iza guterana kuri iki cyumweru. Perezida Kagame wari mu itsinda ry’abayobozi batanze ubuhamya ku byakozwe mu bihugu byabo muri gahunda zitandukanye, ni bwo yagaragaje ko guteza umugore imbere bifite akamaro kanini ku gihugu.

Yagize ati “Hari amasomo twabonye atwereka ko guteza imbere umugore bigira uruhare rukomeye mu iterambere ry’igihugu haba m’ubukungu no mu mibereho myiza. No mu bihe byo gusana igihugu cyacu ndetse no kukibohora abagore b’abanyarwanda babagizemo uruhare rukomeye, haba muri gahunda za politike iz’ubukungu ndetse n’izirebana n’ubumwe n’ubwiyunge. Twasanze kandi guteza imbere umugore byari ngombwa kugira ngo igihugu kibashe gutera imbere ku buryo bwihuse. Ariko icyo twakuyemo ni uko twasanze guteza imbere umugore ari uguteza imbere igihugu cyose".

Perezida Kagame yemeza ko hari byinshi byakozwe mu guteza imbere umugore hirya no hino ku isi, ariko na hari ibigikeneye gukorwa, ati “ Ntitwavuga ko twageze ku rwego rukwiye mu gihe abagore aribo bakora 2/3 by’akazi ko ku isi yose, bagatanga umusaruro urenze kimwe cya kabili cy’ibiribwa bikenerwa ku isi, ariko ugasanga 10% gusa by’ubutunzi abantu binjiza ku isi nibwo bwonyine buri mu biganza by’abagore”.

U Rwanda rwateje umugore imbere, ubu mu nzego zitandukanye, habasabwa ko mu nzego z’ubuyobozi abagore bagenerwamo 30%. Byongeye kandi Inteko Ishinga Amategeko y’u Rwanda ifitemo abagore barenga 50% by’abayigize.

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO