Kuva no guturika kw’udukingirizo bihangayikishije benshi

Kuva no guturika kw’udukingirizo bihangayikishije benshi


Yanditswe kuya 3-02-2012 - Saa 06:58'

Afurika y’Epfo: Tumwe mu dukingirizo turaturika, utundi tukava nk’utuyunguruzo, nk’uko bitangazwa n’ihuriro rikomeye mu kurwanya SIDA muri icyo gihugu.

Ibi iri huriro ryabitangaje ku wa kabiri tariki ya 31 Mutarama 2012, rivuga ko udukingirizo tugaragarwaho kudakora neza tugera kuri miliyoni imwe n’ibihumbi magana atatu na mirongo itanu, turi mu bwoko bw’utwo Leta iherutse gutanga igihe hizihizwaga imyaka ijana ishyaka African National Congress (ANC) riri ku butegetsi rimaze rivutse.

Mokhalipi, umwe mu mpirimbanyi zo kurwanya SIDA muri Afurika y’Epfo, yagize ati: "Twasutse amazi muri utu dukingirizo maze turava. Kandi ntitwavaga mu ruhande rumwe gusa, ahubwo twavaga ahantu henshi nk’akayunguruzo... Urabyirebera harimo utwenge duto nk’utwatobowe n’inshinge.”

Abakozi bo mu biro bishinzwe iby’ubuzima, bo bemeza ko hatanzwe itegeko rihamagarira ihagarikwa ry’utu dukingirizo tugasubizwa Leta, nyamara hari n’abashinzwe ubukangurambaga mu by’ubuzima bo bavuga ko nta kuburira abantu kwabayeho mbere ku baturage ko bashobora kuba baratwaye udukingirizo dufite inenge, ku buryo dushobora gutuma banduzanya Virusi itera SIDA batabizi.

Nk’uko ibiro ntaramakuru by’Abanyamerika AP dukesha iyi nkuru bibivuga, ngo iyi ni inshuro ya gatatu mu gihe kitarenze imyaka itanu muri Afurika y’Epfo bahamagarira abantu gusubiza udukingirizo kubera impamvu zitandukanye zose zigaruka ku mikorerwe yatwo iba itujuje ubuziranenge.

ubundi agakingirizo ubundi gafatwa nk’intwaro ikomeye cyane mu kurwanya SIDA muri iki gihugu cya Afurika y’Epfo kibarwa mu bya mbere ku isi birangwamo ubwandu bwinshi bwa virusi itera SIDA.

Kugeza ubu, iki gihugu nicyo gifite umubare munini w’abarwayi ba SIDA ku isi hose, bagera kuri miliyoni 5,6. Leta ya Afurika y’epfo itanga udukingirizo dusaga miliyoni 425 buri mwaka.

Kuri ubu hari abatangiye gukemanga ubushobozi bw’ibiro bishinzwe iby’ubuziranenge by’Afurika y’Epfo, nk’ikigo cyakabaye kiri ku rwego mpuzamahanga, bitewe ahanini no kuba udukingirizo twinjira mu gihugu duturutse ahandi cyangwa n’udukorerwa imbere mu gihugu dukunze kugaragaraho ibibazo, ku buryo duhamagazwa tukareka gukoreshwa kandi baba baretse tukabanza kugera mu baturage.

Ariko ku bwo kutizera ubuziranenge bw’udukingirizo dutangwa na Leta, bamwe mu baturage ba Afurika y’Epfo bahitamo gukoresha utundi tutari udutangwa na Leta ku buntu, nk’uko bivugwa n’Umuryango Sex Workers Education and Advocacy Taskforce (SWEAT), ufite uburambe mu by’udukingirizo, aho uvuga ko abakora umwuga wo kwicuruza babarirwa hagati y’ibihumbi 10 na 15, bakunda kunenga ubudahangarwa bw’udukingirizo dutangwa na leta.

Uyu muryango SWEAT, uvuga ko aba bakora umwuga w’uburaya bahitamo kwikoreshereza udukingirizo bahabwa n’imiryango y’abagiraneza mpuzamahanga, nk’uko bivugwa na Maria Stacey ushinzwe iterambere muri SWEAT. Agira ati: “Udukingirizo twa “CHOICE’ Leta itanga twinubirwa cyane n’abadukoresha, kandi dufite ibirego byinshi byo gucika kwatwo.”

Naho umuvugizi w’ishami rishinzwe iby’ubuzima rya leta ariko ryigenga, ari naryo ryakwirakwije utu dukingirizo mu baturage igihe hitegurwaga kwizihiza imyaka ijana ANC ibayeho tariki ya 6 n’iya 8 Mutarama, avuga ko leta yatumije ikanahagarikisha ikoreshwa ry’utu dukingirizo ku matariki ya 18 Mutarama, ngo hakaba hadakwiye kubaho guhangayika.

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO