Loni niturasa ntituzipfumbata -Bisimwa

Loni niturasa ntituzipfumbata -Bisimwa


Yanditswe kuya 1-04-2013 - Saa 09:49' na Olivier Rubibi

Umuyobozi w’umutwe M23 wigometse kuri Leta ya Congo Kinshasa aratangaza ko Loni niza ifite gahunda yo kurasa M23 batazipfumbata, kandi ngo n’ubwo basigara ari umusirikare umwe azasigara arwanira ko Abanyekongo babona amahoro.

Bertrand Bisimwa Umuyobozi w’umutwe wa M23 yabitangaje mu kiganiro yagiranye n’abanyamakuru ku cyumweru tariki ya 31 Werurwe, i Bunagana muri Congo Kinshasa. Ubwo yari akomeje kubazwa uko bazitwara nibaramuka bagabweho ibitero n’ingabo z’umutwe udasanzwe washyizweho na Loni, kugira ngo ugarure amahoro muri Kivu, atangaza ko n’ubwo mu mutwe ayoboye hazaba hasigaye umusirikare umwe, azakomeza kurwanira ko Abanyekongo bavuga ikinyarwanda bagira amahoro.

Bisimwa yagize ati “M23 ntabwo ari yo yabujije amahumeko Abanyekongo, ntabwo ari yo yimakaje ruswa mu gihugu kugeza aho kiza ku mwanya wa mbere ku Isi mu kwimakaza ruswa. Ntabwo M23 ari yo ifata abagore ku ngufu muri Katanga n’ahandi. Duharanira ubumwe bw’Abanyekongo bavuga ururimi rw’Ikinyarwanda, babujijwe amahwemo na Leta ya Joseph Kabila. Abanyekongo banamye mu bihugu bitandunye bicwa n’inzara aho batse ubuhungiro. Dutegereje amahoro Loni igiye kuzana muri Congo Kinshasa ikoresheje umutwe wa gisirikare udasanzwe, mu gihe yari ifite abandi basirikare bayo bamaze imyaka 14 bafasha abasirikare ba Congo Kinshasa mu bikorwa by’ubugizi bwa nabi.”

Abajijwe uko bazabigenza igihe bazaba bagabweho ibitero, niba bazihisha cyangwa bazemera bagafatwa bagashyikirizwa inkiko cyangwa se bazahunga igihugu cya Congo Kinshasa nk’uko bene wabo bahunze, Bisimwa yagize ati “Ntabwo dufite ubushobozi bwo kurwana na Loni, ntabwo habe na gato ariko si twe Loni ije kurasa, kuko Congo Kinshasa ifite imitwe myinshi irwanira ko amahoro yaboneka. Nibazanwa no kurasa M23 ntabwo bazaturasa ngo twipfumbate, tuzirwanaho kandi nubwo hasigara umusirikare umwe wa M23 azasigara arwanira ko Abanyekongo babona amahoro n’ubumwe.”

Bisimwa Bertrand yashimangiye ko bashaka ko Abanyekongo bo ubwabo bikemurira ibibazo bafite ko ubufasha bwa Loni babubonye n’aho bubagejeje.

Umuryango w’Abibumbye Loni washyizeho umutwe udasanzwe kuri uyu wa Kabiri w’icyumweru dusoje, ugizwe n’abasirikare bagera ku bihumbi bitatu, uje guhashya imitwe yigometse ku butetsi irwanira mu Burasirazuba bwa Congo Kinshasa.

Gen Sultna Makenga, Umukuru w'ingabo za M23
Bertrand Bisimwa, Umuyobozi w'umutwe wa M23 yitabiriye ikiganiro n'abanyamakuru
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO