RDC : I Rutshuru havutse umutwe urwanya M23

Hashize icyumweru, ahitwa i Binza mu Karare ka Rutshuru, mu burasirazuba bwa Congo Kinshasa, havutse umutwe witwaje intwaro uvuga ko ugamije kurwanya ingabo z’umutwe wa M23 urwanya Leta ya Congo.

Uwo mutwe wiyise “Force Populaire pour la Démocratie” FPD (ugenekereje wavuga ko ari ingabo za rubanda ziharanira demokarasi).

Amakuru dukesha Radio Okapi, avuga ko ivuka ry’uwo mutwe ryatangajwe kuri uyu wa Kabiri, tariki ya 18 Nzeri 2012 n’Umukuru wayo Shetani Muhima witwa na none Colonel Mai-Mai. Avuga ko uyu mutwe ugamije kurwanya M23 kugira ngo ukumire igikorwa cyo gucamo ibice igihugu cya Congo Kinshasa.

Bivugwa ko tariki ya 15 Nzeri 2012, FPD yagabye ibitero mu duce bivugwa ko twari twigaruriwe na FDLR.

Nk’uko Shetani Muhima abitangaza, ibitero byagabwe ku wa gatandatu ushize mu duce twa Nyakakoma, Ishasha, Nyamilima na Kisharo, ni ibyo bibumburiye ibindi bizagabwa.

Utwo duce twagabweho ibitero ni ahahoze harigaruriwe n’abarwanyi ba FDLR.

Abaturage babajijwe bari i Nyamilima, bavuga ko ivuka ry’uwo mutwe mushya w’abarwanyi ribateye impunge cyane batinya ko imirwano yafata indi sura ariko ishyira mu kaga abaturage batahwemye kuvanywa mu byabo.