RDC : Imirwano yabereye i Sake yatewe n’ubusinzi

Imirwano yabereye i Sake ku birometero 27 uvuye mu mujyi wa Goma kuri iki cyumweru yatewe n’ubusinzi bwa bamwe mu ngabo za Leta nk’uko amakuru yatangajwe na Radio Okapi abivuga.

Radio Okapi ivuga ko agatsiko k’abasirikare ba Leta bari basinze ari ko nyirabayazana y’iyi mirwano. Ubuvugizi bw’ingabo za Leta muri aka gace buvuga ko habayeho kurasana kudasobanutse hagati y’abasirikare babiri b’ingabo za Leta bari i Mubambiro mu bilometero bitanu uvuye i Sake.

Aba basirikare bari basinze bamaze kurasana bagenzi babo bumvise urusaku rw’amasasu, bakeka ko ari igitero cy’ingabo za M23 na bo bahita batangira kurasa nk’abagabweho igitero.

Iyi mirwano yahitanye abasivile batatu n’umusirikare umwe, cumi n’icyenda barakomereka n’inzu nyinshi zirangirika.

Ubuyobozi bw’ingabo za Leta bw’i Goma na bwo bwaketse ko ari igitero cy’umutwe wa M23, bwihutira kohereza imodoka z’intambara i Sake zari zikambitse i Goma.