RDC : Zimwe mu ngabo za MONUSCO ziracyekwaho kwica mugenzi wazo kubera diyama

Umuryango w’umunyasenegali wari mu ngabo za Loni zishinzwe kubungabunga amahoro muri Repuburika Iharanira Demukarasi ya Congo (MONUSCO), urasaba Leta ya Senegali gukurikirana iby’iyicwa ry’umwe mu ngabo za MONUSCO, bishoboka ko yishwe n’abamukuriye kubera amabuye y’agaciro.

Nk’uko bigaragazwa na allAfrica.com, se w’uwo musirikare wishwe witwa Assane Faty, yatangaje ko mbere y’iyicwa ry’umuhungu we yagiye amuhamagara mu bihe bitandukanye, amubwira ko abamukuriye bashobora kumuhitana kubera amakimbirane yaturutse ku mabuye y’agaciro, diyama.

Intandaro y’urupfu rw’uwo musirikare wa MONUSCO nk’uko ibitangazamakuru byagiye bibyandika, umubyeyi wa Sadia Faty agaragaza ko umuhungu we yamubwiye kuri telefone ko yajyanye n’abandi muri paturuye (Patrouille), nyuma umusirikare wiswe A.T akambura diyama umusivili, binyuranyije n’amategeko ingabo za Loni zigenderaho. Sadia ashaka kubivuga mbere ngo bititiriwa bose. Ibyo bihita biba intangiriro yo guhozwa ku nkeke abwirwa n’abasirikare batatu biswe AT, IF na B D ko bazamwica.

Umubyeyi wa Sadia akomeza avuga ko AT yashyize diyama mu mufuka wa Sadia, kugira ngo bimwitirirwe nk’ikimenyetso simusiga ko afata amabuye y’agaciro. Sadia yaje gufungwa, ku bw’amahirwe ararekurwa ahindurirwa aho yakoreraga.

Nyuma y’ibyo, MONUSCO yaje gutangaza ko ku itariki ya 8 Ukwakira ko Sadia Faty yapfuye. MONUSCO yatangaje ko Sadia yishwe n’amazi yarohamyemo.

Ibyo kuba yararohamye, umuryango we ntubikozwa usaba Perezida wa Senegal Macky Sall kubikurikirana ; uvuga ko ibimenyetso byagaragajwe nyuma yo gupima umurambo wa Sadia bigaragaza ko yakubiswe, akajugunywa mu mazi yamaze gushiramo umwuka.

Kimwe n’izindi ngabo zose zikandagiye ku butaka bwa Repuburika Iharanira Demukarasi ya Congo, MONUSCO ikekwaho gufata ku mabuye y’agaciro y’icyo gihugu, yaje no kuba intandaro y’umwuka mubi umuryango wa Sadia ugaragaza nk’intandaro y’urupfu rwe.