Uganda : Abana barenga 200 bamaze kwandura indwara yo kuzunguza umutwe

Mu gihugu cya Uganda indwara yo kuzunguza umutwe ikomeje kuba icyorezo ari nako ifata umubare munini w’abaturage ariko cyane cyane abana. Ibi byateye ikibazo bigera n’aho na Leta ishaka kumenya impamvu itera iyi ndwara kuburyo yashyize ho itsinda ry’abashinzwe ubushakashatsi kuri iyi ndwara n’ubwo bavuga ko impamvu nyayo batarayimenya.

Hagati aho ariko nkuko The New Vision dukesha iyi nkuru ibivuga, abaturage bamwe batangiye kuvuga ko ari amarozi, uretse ko Leta yo atariko ibibona ; kuba rero bamwe babyitirira barozi bituma habaho urwikekwe no gutinyana.

Abana barenga 200 ubu bamaze gufatwa n’iyi ndwara yo kuzunguza umutwe ubudatuza kandi abo ni abanduye muri uyu mwaka gusa.

Nk’uko rero abagize inteko ishinga amategeko baganiriye n’abaturage ngo basanze ubwoba ari bwinshi kuko iyi ndwara ngo iri kugenda ifata intera yo hejuru.

Abana banduye iyi ndwara rero bahabwa ibiribwa, imyambaro, nkuko umuganga Nicole Nancy Nyeko ubakurikirana abivuga.